කෘෂිකර්ම හා වැවිලි කර්මාන්ත අමාත්‍යාංශය යටතේ ඇති විදේශ අරමුදල් මත ක්‍රියාත්මක සියලු ව්‍යාපෘතිවල මුදල් පරිහරණය හා ව්‍යාපෘති ක්‍රියාත්මක කර ඇති ආකාරය පිළිබඳව විශේෂ විමර්ශනයක් සිදු කරන්නැයි කෘෂිකර්ම හා වැවිලි කර්මාන්ත ඇමැති මහින්ද අමරවීර මහතා එම අමාත්‍යාංශයේ ලේකම් ජානක ධර්මකීර්ති මහතාට උපදෙස් ලබාදී ඇත.
කෘෂිකර්ම අමාත්‍යාංශය යටතේ විදේශ අරමුදල් මත ක්‍රියාත්මක ව්‍යාපෘති හතරක් වන අතර, වැවිලි කර්මාන්ත විෂය යටතේ ව්‍යාපෘති දෙකක් ක්‍රියාත්මකව පවතී. විශේෂයෙන් මෙම ව්‍යාපෘති සඳහා විදේශ අරමුදල් ලබා දී ඇත්තේ ණය ආධාර වශයෙන් වන අතර, එම මුදල් නැවත අදාළ විදේශ නියෝජිතායතන වෙත ගෙවිය යුතුව ඇත. නමුත් මෙම ව්‍යාපෘති මඟින් මුදල් වියදම් කිරීමේදී හා ව්‍යාපෘති ක්‍රියාත්මක කිරීමේදී අඩුපාඩු රැසක් පවතින බව අමරවීර මහතා පෙන්වා දෙයි. ගොවි ජනතාවට ප්‍රතිලාභ ලබාදීම සඳහා ලබා දිය යුතු එම මුදල් නිකරුණේ වියදම් කිරීම මඟින් විශාල මුදලක් අපතේ ගොස් ඇති බවට තමාට වාර්තා වී ඇතැයි ද ඇමැතිවරයා කියයි.
එමෙන්ම මෙම ව්‍යාපෘති භාර නිලධාරීන් පාර්ලිමේන්තුවේ කෝපා සහ කෝප් කමිටු ඉදිරියට කැඳවා කරුණු විමසිය යුතු බව ද අමරවීර මහතා අවධාරණය කරයි.
