යතුරුපැදියකින් පැමිණි නාඳුනන පුද්ගලයන් දෙදෙනෙක් උඩහමුල්ල ලංගම ඩිපෝවේ කොන්දොස්තරවරයෙකුගේ ඇඟිල්ල පිහියකින් කපා ඔහු සන්තකයේ තිබූ රුපියල් 7300/= මුදලක් කොල්ල කා පලා ගොස් ඇතැයි ඉංගිරිය පොලීසිය කියයි
තුවාල ලද ඉංගිරිය පහළ ඌරුගල පදිංචි කොන්දොස්තර වරයා ප්‍රතිකාර සඳහා හොරණ මූලික රෝහල වෙත ඇතුළත් කර ඇත
මාර්ග අංක 176 ඉංගිරිය හෙට්ටියා වත්ත උදෑසන ඉංගිරිය නගරයෙන් ආරම්භ කරන බස් රථයේ සේවය සදහා සඳහා ත්‍රීරෝද රථයකින් ඉංගිරිය නගරයේ වෙත පැමිණ තිබූ කොන්දොස්තරවරයා තිරෝද රථය වෙළෙඳ සලක් අසල නවතා ප්‍රවේශපත්‍ර යන්ත්‍රය රැගෙන ගාල් කර තිබූ බස්රථය වෙත පැමිණෙමින් සිටියදී මෙම සිද්ධිය වී තිබූ බව පොලිසිය කියයි
බස් රථය ආසන්නයට කොන්දොස්තරවරයා පැමිණෙමින් සිටියදී මුහුණ වැසෙන සේ ආරක්ෂක හිස් වැසුම් පැළඳ යතුරු පැදියකින් පැමිණ තිබූ නාඳුනන පුද්ගලයන් දෙදෙනෙකුගෙන් පසු පැදිකරු අතුරු පැදියෙන් බැස කොන්දොස්තරවරයා අසලට පැමිණ ඔහුට පහර දී කමිස සාක්කුවේ දමා තිබූ මුදල් පැහැරගෙන ඇති අතර එම අවස්ථාවේ එය වැළැක්වීම සඳහා කොන්දොස්තරවරයා උත්සාහ දැරීමේදී කොල්ලකරු අත තිබූ පිහිය එල්ල කිරිම හේතුවෙන් කොන්දොස්තර වරයාට තුවාල සිදුවී තිබූ බව පොලිසිය කියයි
තුවාල ලද කොන්දොස්තරවරයා ඒ මොහොතේම ඉංගිරිය දිසා රෝහල වෙත ඇතුළත් කර ඇති අතර ඔහුගේ වම් අතේ මාපටැගිල්ල ට තුවාල සිදුවීම හේතුවෙන් මැහුම් තුනක් යෙදීමට සිදු වූ බව රෝහල් ප්‍රකාශකයකු පැවසීය
අනතුරුව කොන්දොස්තරවරයා එක්ස්‍ රේ පරීක්ෂණයක් සඳහා හොරණ මූලික රෝහල වෙත යොමු කළ බව එම ප්‍රකාශකයා වැඩිදුරටත් පැවසීය
