මස්සිනා මරපු නඩුවෙදී නැන්දම්මාට සාක්ෂි නොදෙන ලෙස තර්ජනය කරමින් සිය බිරිය පුටුවක ගැට ගසා ගිනි තබා මරා දැමීමට තැත් කළ බව කියන අයකු දෙසැම්බර් මස 08 වැනිදා දක්වා රක්ෂිත බන්ධනාගාරගත කරන ලෙස බළපිටිය මහේස්ත්‍රාත් චරිත ජයම්පති හංසදේව සමරදිවාකර මහතා නියම කළේය.
මෙසේ රක්ෂිත බන්ධනාගාරගත කරනු ලැබුවේ අම්බලන්ගොඩ රන්දොඹේ යන ලිපිනයේ තාවකාලිකව පදිංචිව සිටින දිනුෂ නුවන් කොඩිතුවක්කු නමැති අයෙකි. බිරියගේ සොහොයුරා වන මස්සිනාට පිහියකින් ඇන ඝාතනය කිරීමේ නඩුවේ ප්‍රධාන සැකකරු මොහු වන අතර එම නඩුව බළපිටිය අධිකරණයේ විභාග වෙමින් පවතින බවත්, එහි ප්‍රධාන සාක්ෂිකාරිය නැන්දම්මාට සාක්ෂි නොදෙන ලෙස තර්ජනය කිරීමේ වරදට මීට පෙර රක්ෂිත බන්ධනාගාරගතව ඇප මත නිදහස් වී පැමිණි අයකු බව පොලිසිය පවසයි.
නැන්දම්මා සාක්ෂි දුන්නොත් මරා දමන බව කියමින් බිරිය කාමරයක දමා පුටුවක ගැට ගසා කොට්ට මෙට්ට ඇඳි ඇතිරිලි ආදිය ඇඟට දමා ගිනි තැබීමට සූදානම් වන අවස්ථාවේ දී අත්අඩංගුවට ගෙන ඉදිරිපත් කළ බව අධිකරණය හමුවේ පොලිසිය පවසා ඇත.
වින්දිතයන් සහ සාක්ෂිකරුවන්ට බලපෑම් කිරීම සහ බිරිය ඝාතනය කිරීමට තැත් කිරීමේ චෝදනා මත මොහු රක්ෂිත බන්ධනාගාරගත කරන ලෙස මහේස්ත්‍රාත්වරයා නියම කර තිබේ.
අම්බලන්ගොඩ පොලිසියේ පොලිස් සැරයන් සිරිලාල් (16915) මහතා විසින් සැකකරු අධිකරණය වෙත ඉදිරිපත් කරමින් නඩුව මෙහෙයවිය.
