සැකකරුවන්ගේ මුහුණු හඳුනා ගැනීමට වීඩියෝ තාක්ෂණය පළමුවරට උසාවියට

-උසාවියේ පුළුල් තිරයේ ප්‍රදර්ශනය කරමින් ඡායාරූප 108ක් ලකුණු කරයි

පොලොන්නරුව දිස්ත්‍රික් හිටපු පාර්ලිමේන්තු මන්ත්‍රී අමරකීර්ති අතුකෝරල හා ඔහුගේ ආරක්ෂක පොලිස් සැරයන් අහංගම විතානරලාගේ ජයන්ත ගුණවර්ධන ඝාතන සිද්ධියට සම්බන්ධ සැකකරුවන්ගේ මුහුණු නිසැකවම හඳුනා ගැනීම සඳහා වීඩියෝ තාක්ෂණය භාවිත කිරීමට අවසර දෙන ලෙස නීතිපතිවරයා ගම්පහ ත්‍රිපුද්ගල මහාධිකරණයේ අවසර ඉල්ලා සිටියේය.

මෙම නඩුවට අදාළ සිද්ධිය සම්බන්ධයෙන් ඇති සීසීටීවී දර්ශනවල සිටින සැකකරුවන්ගේ මුහුණු හඳුනා ගැනීම සඳහා වීඩියෝ තාක්ෂණය යොදා ගැනීමට අපේක්ෂා කරන බව ප්‍රකාශ කරමින් නීතිපතිවරයා වෙනුවෙන් පෙනී සිටි නියෝජ්‍ය සොලිසිටර් ජනරාල් ජනක බණ්ඩාර මහතා මෙම ඉල්ලීම කළේය. මෙහි දී නියෝජ්‍ය සොලිසිටර් ජෙනරාල් ජනක බණ්ඩාර මහතා නඩු විභාගය ආරම්භ කිරීමට පෙර වැඩිදුරටත් කරුණු දක්වමින් ලංකාවේ පළමු වතාවට වීඩියෝ දර්ශන අනුව මුහුණු හඳුනා ගැනීම සඳහා ඉදිරි දිනක රජයේ රස පරීක්ෂක දෙපාර්තමේන්තුව විශේෂඥ නිලධාරියකු ද සාක්ෂියට කැඳවන බව කියා සිටියේය.

පුද්ගල ඝාතන නඩුවක සැකකරුවන් හඳුනා ගැනීම සඳහා මෙලෙස වීඩියෝ තාක්ෂණය භාවිත කිරීමට නීතිපති දෙපාර්තමේන්තුව විසින් කටයුතු කළ පළමු අවස්ථාව මෙය වේ.

එම ඝාතන නඩුව ඉකුත් 01 වැනිදා විභාගයට කැඳවූ අවස්ථාවේ විත්තියේ නීතිඥ ශිරාණි දිසානායක මහත්මිය මතු කළ විරෝධතාවයක් ප්‍රතික්ෂේප කරමින් සිද්ධියට අදාළ වීඩියෝ දර්ශන විවෘත අධිකරණයේදී පුළුල් තිරයක ප්‍රදර්ශනය කිරීමට අවසර ලබා දෙමින් ගම්පහ විශේෂ ත්‍රිපුද්ගල විනිසුරු මඬුල්ල නඩු විභාගය ආරම්භ කරනු ලැබීය.

එම නඩුව ඉකුත් 01 වැනිදා පෙරවරු 10ට සහන් මාපා බණ්ඩාර (සභාපති), රස්මි සිංගප්පුලි හා ඩී. ඒ. රුවන් පතිරණ යන මහත්වරුන්ගෙන් සැදුම්ලත් විශේෂ ත්‍රිපුද්ගල විනිසුරු මඬුල්ල ඉදිරියේ කැඳවනු ලැබීය.

මෙහිදී ඇප මත මුදා හැර සිටින විත්තිකරුවන් තිස් හය දෙනෙකු අතරින් තිස් හතර දෙනෙක් අධිකරණය ඉදිරියේ පෙනී සිටියහ.

ඇප මත මුදා හැරීමෙන් අනතුරුව වෙනත් සිද්ධීන් සඳහා රිමාන්ඩ් භාරයේ රඳවා සිටින විත්තිකරුවෝ බන්ධනාගාර නිලධාරීන් විසින් අධිකරණයට ඉදිරිපත් කරනු ලැබූහ.

ඇප තබා ගැනීමට නොහැකි වී සිටින රාමයියා සත්‍ය කුමාර් නමැති විත්තිකරු ද බන්ධනාගාර නිලධාරීන් විසින් අධිකරණයට ඉදිරිපත් කරනු ලැබුවේය.

නම් කරන ලද තවත් විත්තිකරුවන් දෙදෙනකු නොමැතිව ඔවුන් දෙදෙනා ඇතුළුව විත්තිකරුවන් තිස් නව දෙනෙකුට එරෙහිව නඩු විභාගය පැවැත්වේ.

මෙහිදී නියෝජ්‍ය සොලිසිටර් ජනරාල් ජනක බණ්ඩාර මහතා කරුණු දක්වමින් සිද්ධිය වූ ස්ථානය, සිතාරා මීමන නීතිඥ කාර්යාල, ශක්ති වයින් ස්ටෝර්ස් යන ස්ථානවල සීසීටීවී කැමරාවල සටහන් වී ඇති දර්ශන හා මාධ්‍යවේදියකුගේ ජංගම දුරකතනයක සටහන් වී ඇති සිද්ධිය වූ අවස්ථාව හා ඒ ආසන්න වේලාවල දර්ශන විවෘත අධිකරණයේදී විනාඩි දොළහයි තත්පර පනස් නමයක කාලයක් පුළුල් තිරයේ ප්‍රදර්ශනය කිරීමට අවසර ලබා දෙන ලෙසට ඉල්ලා සිටියේය.

මෙහිදී විත්තියේ නීතිඥ ශිරාණි දිසානායක මහත්මිය කරුණු දක්වමින් ඉල්ලීම පරිදි වීඩියෝ දර්ශන ප්‍රදර්ශනය කළ හොත් අපරාධ නඩු විධාන සංග්‍රහ පනතේ 198 (1) වගන්තිය ප්‍රකාරව අධිකරණ මනස නොමඟ යැවීමට උත්සාහයක් ගන්නා බැවින් එයට විරුද්ධත්වය ප්‍රකාශ කරන බව කියා සිටියාය.

විත්තියේ නීතිඥ ප්‍රදීප් පෙරේරා මහතා කරුණු දක්වමින් වීඩියෝ දර්ශන ප්‍රදර්ශනය කිරීම ආණ්ඩුක්‍රම ව්‍යවස්ථාවට පටහැණි බව කියා සිටියේය.

නියෝජ්‍ය සොලිසිටර් ජනරාල් ජනක බණ්ඩාර මහතා :-

එම නීතිඥ මහතා අධිකරණය ඉදිරියේ පෙනී නොසිටින විත්තිකරුවකු වෙනුවෙන් නේද පෙනී සිටින්නේ.

මෙහිදී දෙපාර්ශ්වයේ කරණු දැක්වීම්වලින් අනතුරුව මහාධිකරණ විනිසුරු මඬුල්ල විත්තියේ විරෝධතා ප්‍රතික්ෂේප කරමින් වීඩියෝ දර්ශන ප්‍රදර්ශනය කිරීමට අවසර ලබා දීමෙන් අනතුරුව නිට්ටඹුව නගරයේ සිද්ධිය වූ ස්ථානය හා අවට ප්‍රදේශයන්හි වීඩියෝ දර්ශන ප්‍රදර්ශනය කරනු ලැබීය.

වීඩියෝ දර්ශන ප්‍රදර්ශනය කිරීමෙන් අනතුරුව ගම්පහ අපරාධ ස්ථාන පරීක්ෂණාගාරයේ එවකට ස්ථානාධිපතිවරයා වශයෙන් රාජකාරියේ නියැළී සිටි වවුනියාව වත්මන් අපරාධ ස්ථාන පරීක්ෂණාගාරයේ ස්ථානාධිපති ප්‍රධාන පොලිස් පරීක්ෂක කේ. ඒ. ඇන්. ඩී. කොල්ලුරේ මහතා නියෝජ්‍ය සොලිසිටර් ජනරාල් ජනක බණ්ඩාර මහතාගේ මෙහෙයවීම යටතේ සාක්ෂි ලබා දෙමින් මෙසේ කියා සිටියේය.

මම වර්තමානයේ වවුනියාව අපරාධ ස්ථාන පරීක්ෂණාගාරයේ ස්ථානාධිපතිවරයා වශයෙන් රාජකාරි කරනවා.

2022.05.09 වනදා වන විට මම රාජකාරියේ යෙදී සිටියේ ගම්පහ අපරාධ ස්ථාන පරීක්ෂණාගාරයේ ස්ථානාධිපතිවරයා වශයෙනුයි. එදින නිට්ටඹුව පොලිස් ස්ථානාධිපති ප්‍රධාන පොලිස් පරීක්ෂක අබේරත්න මහතාගෙන් ලැබුණු පණිවුඩයකට අනුව මම පස්වරු 22.20ට නිට්ටඹුව නගරයට ගියා. මම ගියේ ප්‍රධාන පොලිස් පරීක්ෂක සිල්වා, උප පොලිස් පරීක්ෂක වික්‍රමාරච්චි හා පොලිස් සැරයන් රත්නායක යන නිලධාරීන් ද සමඟයි.

අපි අපරාධ ස්ථානයට පරීක්ෂණයට අදාළ උපකරණ කට්ටලයක්, විදුලි පන්දම් හා ඩිජිටල් කැමරා රැගෙන ගියා. අපි 22.20ට නිට්ටඹුව නිහාල් ෆැෂන් ආයතනය ඉදිරිපිටට ගියා. ඒ අවස්ථාවේ නිට්ටඹුව පොලිස් ස්ථානයේ පොලිස් නිලධාරීන් පිරිසක් ද එම ස්ථානයේ ආරක්ෂක රාජකාරියේ යෙදී සිටියා. එම ආයතනයේ ඇතුළු වීමේ දොරටුව වසා තිබුණා. එම ආයතනය ඉදිරිපිට බිම මිය ගොස් සිටි දෙදෙනාගේ මෘත ශරීර තිබුණා.

ඒඅවස්ථාවේ විදුලි බල්බ දැල්වෙමින් තිබුණා. දෙදෙනාගේම සිරුරුවල ලේ තැවරී තිබුණා. අත්තනගල්ල මහේස්ත්‍රාත්තුමිය එම ස්ථානයට පැමිණීමෙන් පසුව නිහාල් ෆැෂන් ආයතනයේ ඇතුළු වීමේ දොරටුව විවෘත කළා.