ඉලංගෙයි තමිල් අරසු පක්ෂයේ (ITAK) නව නායකයා ලෙස යාපනය දිස්ත්‍රික් පාර්ලිමේන්තු මන්ත්‍රී එස්. ශ්‍රීධරන් මහතා පත්ව තිබේ. පක්ෂයේ නව නායකයා තෝරා ගැනීම සඳහා ඊයේ (21) පෙරවරුවේ ත්‍රිකුණාමලය නගර ශාලාවේ දී රහස් ඡන්දයක් පැවැති අතර, රහස් ඡන්දයේ අවසන් ප්‍රතිඵලය ප්‍රකාශයට පත් කිරීමත් සමඟ ශ්‍රීධරන් මන්ත්‍රීවරයා ඡන්ද 184ක් ලබා තිබෙන බවට පක්ෂ මූලස්ථානය නිවේදනය කළේය.
ඒ මහතාට එරෙහිව තරග කළ පාර්ලිමේන්තු මන්ත්‍රී එම්. ඒ. සුමන්තිරන් මහතා ඡන්ද 137ක් ලබාගෙන තිබෙන අතර, මේ අනුව පක්ෂයේ සභාපතිවරයා ලෙස සිවඥානම් ශ්‍රීධරන් මන්ත්‍රීවරයා තේරී පත් වූයේ වැඩි ඡන්ද 47ක් ලබා ගනිමිනි. මෙම ඡන්ද විමසීමේ දී පක්ෂයේ මහා සභා සාමාජිකයින් 340 දෙනෙක් ඡන්දය ප්‍රකාශ කළහ. පක්ෂයේ නායකත්වය සඳහා එම්. ඒ. සුමන්තිරන්, එස්. ශ්‍රීධරන් සහ එස්. යෝගේෂ්වරන් යන පාර්ලිමේන්තු මන්ත්‍රීවරුන් ඉදිරිපත්ව සිටි අතර, රහස් ඡන්දයකින් නව නායකයා තෝරා පත්කර ගැනීම සිදු විණි. හිටපු පාර්ලිමේන්තු මන්ත්‍රී සිනීතම්බි යෝගේස්වරන් ඡන්දය ප්‍රකාශ කිරීමට සහභාගී නොවීය. මැතිවරණයට පෙර පාර්ලිමේන්තු මන්ත්‍රී සිවඥානම් ශ්‍රීධරන් මහතාට සහාය පළ කළ බව ප්‍රකාශ කළද ඔහුට කිසිදු ඡන්දයක් ලැබුණේ නැත. ලබන 28 වැනිදා පැවැත්වෙන පක්ෂයේ ජාතික සමුළුවේදී නව නායකයා නිල වශයෙන් සිය ධුරයේ වැඩ භාර ගන්නා බව පක්ෂයේ මහා ලේකම් පද්මනාදන් සත්‍යලිංගම් මහතා පැවසීය.
එහිදී නායකයා ලෙස තේරී පත් වූ පාර්ලිමේන්තු මන්ත්‍රී සිවඥානම් ශ්‍රීධරන් මන්ත්‍රීවරයා අදහස් දක්වමින් දෙමළ ජනතාවගේ අභිලාෂයන් දිනා ගැනීම සඳහා සියලු දෙනා එක්වී ශක්තිමත්ව සමඟිය ගොඩනඟන ලෙස ඉල්ලා සිටියේය.
