දෙවුන්දර තුඩුවේ සිට නාවික සැතපුම් 100ක් පමණ දුරින් වූ දකුණු මුහුදු ප්‍රදේශයේ සිදුකළ විශේෂ සෝදිසි මෙහෙයුමක් මගින් අත්අඩංගුවට ගත් රුපියල් මිලියන1626කට අධික වටිනාකමකින් යුත් හෙරොයින් මත්ද්‍රව්‍ය කිලෝග්‍රෑම් හැට පහකට (65) අධික තොගයක් උර තුනක (03) ප්‍රවාහනය කරමින් සිටි සැකකරුවන් එකොළොස් දෙනා ලබන 26 තෙක් පොලිස් මත්ද්‍රව්‍ය නාශක කාර්යාංශය රඳවා තබන ලෙස කොටුව මහේස්ත්‍රාත් තිළිණ ගමගේ මහතා ඊයේ(21) නියෝග කළේය.
මෙරට බහුදින ධීවර යාත්‍රාවක් සහ ඊට සහයවූ බවට සැක කෙරෙන තවත් බහුදින ධීවර යාත්‍රාවක් සමඟ සැකකරුවන් එකොළොස් දෙනෙකු ශ්‍රී ලංකා නාවික හමුදාව විසින් මෙසේ අත්අඩංගුවට ගෙන අධිකරණයට ඉදිරිපත් කිරීමෙන් අනතුරුව මහේස්ත්‍රාත් වරයා මේ නියෝග සිදු කළේය. 11 වන සැකකරු හෘදයාබාධ තත්ත්වයක් හේතුවෙන් කොළඹ ජාතික රෝහලේ ප්‍රතිකාර ලබන බව පොලිස් මත්ද්‍රව්‍ය නාශක කාර්යාංශය අධිකරණයට දන්වා සිටියේය. අත්අඩංගුවට ගත් නදීකා සහ දිල්රූ යන බහුදින ධීවර යාත්‍රා දෙක නියෝගයක් නිකුත් කරන තෙක් ගාල්ල නාවික හමුදා දක්ෂිණ ජැටියේ රඳවා තබන ලෙස ආරක්ෂක දෙපාර්තමේන්තුවේ අණදෙන නිලධාරීවරයාට නියෝග කළ මහේස්ත්‍රාත්වරයා යාත්‍රා දෙකෙහි සිටි මසුන් නීත්‍යනුකූලව විකුණා එහි මුදල් නඩුවට බැර කරන ලෙස ධීවර හා ජලජ සම්පත් දෙපාර්තමේන්තුවට නියෝග කළේය. සැකකරුවන්ගේ දුරකථන දත්ත වාර්තා කැඳවන ලෙස නියෝග කළ මහේස්ත්‍රාත්වරයා 11 සැකකරු පරීක්ෂා කර අද සුදුසු නියෝගයක් සිදු කරන බව දන්වා සිටියේය. මෙම මෙහෙයුම මඟින් අත්අඩංගුවට ගත් සැකරුවන් වයස අවුරුදු 28ත් 52ත් අත‍ර වන මාතර, ගන්දර සහ දෙවුන්දර යන ප්‍රදේශයන්හි පදිංචිකරුවෝ වෙති.
සුභාෂිණී සේනානායක, ගයාන් කුමාර වීරසිංහ, රක්ෂණ ශ්‍රියන්ත, දකුණු පළාත් සංචාරක – එස්. දීයගහගේ, හිනිඳුම – රවින්ද්‍ර ලියනගේ
