කරාපිටිය ශික්ෂණ රෝහලේ පිළිකා වාට්ටුවේ විශේෂඥ වෛද්‍ය ක්‍රිෂාන්ත පෙරේරා මහතාට පහර දීම සම්බන්ධයෙන් අත්අඩංගුවට ගෙන අධිකරණය වෙත ඉදිරිපත් කරන ලද එම රෝහලේ කනිෂ්ඨ කාර්ය මණ්ඩලයේ සේවකයින් දෙදෙනා සහ සේවිකාව මේ මස 29 වන දින දක්වා රක්ෂිත බන්ධනාගාරගත කර එදිනට හඳුනා ගැනීමේ පෙරෙට්ටුවකට ඉදිරිපත් කිරීමට ගාල්ල වැඩබලන මහේස්ත්‍රාත් මහිනාථ දහනායක මහතා ඊයේ ( 21 ) සවස නියෝග කළේය.
මෙසේ රක්ෂිත බන්ධනාගාරගත කරන ලද්දේ ගාල්ල කොට්ටවගම පදිංචි අනෝමා නිලන්ති සුබසිංහ, අකුරැස්ස දියලපේ පදිංචි සුජීවන් විජේසිංහ සහ පෝද්දල පදිංචි ප්‍රදීප් ලාල් ජාගොඩ යන සෞඛ්‍ය කාර්ය සහායකයින් තිදෙනා වෙති.
පසුගිය 16 වන දින පැවති වැඩ වර්ජනයට පිළිකා වාට්ටුවේ සේවකයින් සහභාගි නොවන බවට ප්‍රකාශ කර ඇතත් කරාපිටිය රෝහලේ පිළිකා වාට්ටුවේ කනිෂ්ඨ සේවකයින් වර්ජනයට සහභාගි වීම සම්බන්ධයෙන් පසු දින වෛද්‍යවරයා සහ කනිෂ්ඨ කාර්ය මණ්ඩලය අතර ඇතිවූ ආරවුලකදී කනිෂ්ඨ සේවකයින් විසින් තමාට පහර දුන් බවට වෛද්‍යවරයා විසින් කර තිබූ පැමිණිල්ලක් අනුව මෙම සැකකරුවන් දෙදෙනා සහ සැකකාරිය අත්අඩංගුවට ගෙන තිබේ. මේ අතර කනිෂ්ඨ කාර්ය මණ්ඩලයේ සේවකයෙකුට සහ සේවිකාවකට එදින පහර දීමේ චෝදනාව යටතේ පසුගිය 18 වන දින අත්අඩංගුවට ගන්නා ලද වෛද්‍යවරයා අද ( 22 ) දක්වා රක්ෂිත බන්ධනාගාරගත කර ඇත. අත්අඩංගුවට ගන්නා ලද සැකකරුවන් සහ සැකකාරිය වැඩබලන මහේස්ත්‍රාත්වරයා වෙත ඉදිරිපත් කරමින් පොලිසිය කියා සිටියේ පරීක්ෂණ තවමත් අවසන් නොමැති අතර, තමාට පහර දුන් සැකකරුවන් නැවත දුටුවොත් හඳුනා ගත හැකි බවට වෛද්‍යවරයා සහ සාක්කිකරුවන් ප්‍රකාශ ලබා දී ඇති බවය. ඒ අනුව සැකකරුවන් සහ සැකකාරිය හඳුනා ගැනීමේ පෙරෙට්ටුවකට ඉදිරිපත් කරන ලෙසද පොලිසිය ඉල්ලා සිටියේය. ඉදිරිපත් වූ කරුණු සැලකිල්ලට ගත් වැඩබලන මහේස්ත්‍රාත්වරයා සැකකරුවන් සහ සැකකාරිය එදිනට හඳුනා ගැනීමේ පෙරෙට්ටුවකට ඉදිරිපත් කිරීමටද නියෝග කළේය. ගාල්ල පොලිසියේ විවිධ පැමිණිලි අංශයේ ස්ථානාධිපති ප්‍රධාන පොලිස් පරීක්ෂක ලලිත් සිල්වා මහතාගේ උපදෙස් පරිදි උප පොලිස් පරීක්ෂක විදුර මහතා සැකකරුවන් අධිකරණයට ඉදිරිපත් කළේය. සැකකරුවන් වෙනුවෙන් නීතිඥ පූර්ණිකා රාජපක්ෂ මහත්මිය පෙනී සිටියාය.
මේ අතර ගාල්ල කරාපිටිය ශික්ෂණ රෝහලේ පිළිකා රෝග පිළිබද විශේෂඥ ශල්‍ය වෛද්‍ය ක්‍රිෂාන්ත පෙරේරා මහතාට තර්ජනය කොට පහරදිමට තැත්කිරිමේ සිද්ධිය හා විශේෂඥ ශල්‍ය වෛද්‍යවරයා විසින් කනිෂ්ඨ කාර්යමණ්ඩලයේ සේවිකාවකට හා සේවකයෙකුට පහරදුන් බව කියන සිද්ධිය සම්බන්දයෙන් මේ වනවිටත් සෞඛ්‍ය අමාත්‍යංශය මගින් පරික්ෂණයක් ආරම්භකොට ඇති බව කරාපිටිය ශික්ෂණ රෝහලේ අධ්‍යක්ෂ විශේෂඥ වෛද්‍ය එස්.පි.යු.එම් රංග මහතා සදහන් කරයි.
