දිනුර කලුපහනගේ අර්ධ ශතකයත්, මල්ෂ තරුපතිගේ දක්ෂ පන්දු යැවීමත් හේතුවෙන් දකුණු අප්‍රිකාවේ පැවැත්වෙන අවුරුදු 19න් පහළ ලෝක කුසලාන ක්‍රිකට් තරගාවලියේ සහභාගි වූ පළමු තරගයෙන් සිම්බාබ්වේ පිලට එරෙහිව ඩක්වරත් ලුවිස් න්‍යාය අනුව ලකුණු 39ක ජයක් හිමි කර ගැනීමට ශ්‍රී ලංකා කණ්ඩායම සමත් විය.
තරගාවලියේ තෙවැනි දිනය වූ ඊයේ කිම්බර්ලිහිදී පැවති තරගයේ පළමුව පන්දුවට පහර දුන් ශ්‍රී ලංකා පිල ඕවර 48.3කදී ලකුණු 204ක් රැස් කළ අතර,
මල්ෂ තරුපති
සිම්බාබ්වේ පිළිතුරු ඉනිමට වර්ෂාවෙන් බාධා වන විට ඔවුන් ඕවර 13.2කදී කඩුලු 3කට ලකුණු 30ක් රැස් කර තිබිණි. යළි තරගය ආරම්භ වූයේ ඩක්වර්ත් ලුවිස් න්‍යාය අනුව සිම්බාබ්වේ පිලට ඕවර 22කදී ලකුණු 129ක ඉලක්කයක් සමඟිනි. එම ඉලක්කය හඹා ගිය ඔවුන්ට ඕවර 21.1කදී සියල්ලන් දැවී රැස් කළ හැකි වූයේ ලකුණු 89ක් පමණි.
නායක මැතිව් ෂොන්කන් ලකුණු 27ක් රැස් කරමින් සිම්බාබ්වේ ඉනිමේ වැඩිම ලකුණුලාභියා වූ අතර, දක්ෂ පන්දු යැවීමක නිරත වූ මල්ෂ තරුපති කඩුලු 4ක් දවා ගත්තේය. ඔහුට අනගි සහායක් දුන් විශ්ව ළහිරු සහ රවිෂාන් පෙරේරා කඩුලු 2 බැගින්ද, දිනුර කලුපහන සහ ගරුක සංකේත් කඩුල්ල බැගින් ද දවා ගත්හ.
පළමුව පන්දුවට පහර දීමට පිටියට පිවිසි ශ්‍රී ලංකා කණ්ඩායමේ මුල් කඩුලු 3 ලකුණු 12ක් තුළ දවා ගැනීමට සිම්බාබ්වේ පන්දු යවන්නන් සමත්වූ අතර, අංක 6 පිතිකරු දිනුර කලුපහන අර්ධ ශතකයක් රැස් කරමින් ඉනිම පිළිසකර කළේය.
ඔහුට පෙර රවිෂාන් ද සිල්වා (31) සහ රුසඳ ගමගේ (31) ලකුණු 54ක සබඳතාවක් පිහිටුවීමට සමත් වූහ. කෙසේ වෙතත් මුළු ලකුණු 88ක් වෙද්දී ඔවුන් දෙදෙනා දැවී ගිය අතර, දිනුර සමඟ එක්වූ සාරුජන් ෂන්මුගනාදන් 6 වැනි කඩුල්ලට පන්දු 72කින් ලකුණු 80ක සබඳතාවක් පිහිටුවීමට සමත් විය. පන්දු 55කදී හතරේ පහර 6ක් සහ හයේ පහර 2ක් සමඟ ලකුණු 60ක් රැස් කළ දිනුර දැවී යෑමෙන් එම සබඳතාව නිමා වූ අතර, ඉනිම නිමා වන තෙක් කඩුල්ලේ රැඳී සිටි සාරුජන් නොදැවී ලකුණු 41ක් රැස් කළේ හතරේ පහර 3ක් සමඟ පන්දු 40කිනි.
පන්දු යැවීමේදී කෝල් එක්ස්ටීන් කඩුලු 3ක් බිඳ දැමූ අතර, මැතිව් ෂොන්කන් සහ නිව්මන් නයම්හුරි කඩුලු 2 බැගින් දවා ගත්හ.
ඊයේ පැවති අනෙක් තරගයේදී නේපාල කණ්ඩායමට එරෙහිව ලකුණු 64ක ජයක් හිමි කර ගැනීමට නවසීලන්තය සමත් විය.
ශ්‍රී ලංකා කණ්ඩායම සහභාගී වන දෙවැනි තරගය 24 වැනිදා නැමීබියාවට එරෙහිව පැවැත්වේ.
මේ අතර තරගාවලිය දෙවැනි දිනය වූ පෙරේදා (20) පැවති තරගවලින් ජයග්‍රහණ අත්කර ගැනීමට ඉන්දියාව, එංගලන්තය සහ පාකිස්තානය සමත් විය.
වත්මන් ශූර ඉන්දියාව බංග්ලාදේශයට එරෙහිව ලකුණු 84ක ජයක් වාර්තා කළ අතර, එංගලන්තය හමුවේ ස්කොට්ලන්තය කඩුලු 7කින් පරාජයට පත්විය. පාකිස්තානය ලකුණු 181ක දැවැන්ත ජයක් වාර්තා කළේ ඇෆ්ගනිස්තානයට එරෙහිවය. අද තරගාවලියේ සිවුවැනි දිනය යටතේ බංග්ලාදේශ-අයර්ලන්තය සහ ඔස්ට්‍රේලියා-නැමීබියා තරග පැවැත්වේ.
ශ්‍රී ලංකා යොවුන් පිල – 204 (ඕවර 48.3) දිනුර කලුපහන 60, සාරුජන් ෂන්මුගනාදන් නොදැවී 41, රවිෂාන් ද සිල්වා 31, රුසඳ ගමගේ 31 (කෝල් එක්ස්ටීන් 40/3, මැතිව් ෂොන්කන් 36/2, නිව්මන් නයම්හුරි 50/2)
සිම්බාබ්වේ – 89 (ඕවර 21.1) (මල්ෂ තරුපති 17/4, රුවිෂාන් පෙරේරා 2/2, විශ්ව ළහිරු 12/2)
