තම දරුවන් දෙදෙනාට අමානුෂික ලෙස පහර දී එය විඩියෝගත කර සමාජ මාධ්‍යයට එක් කළ දරුවන්ගේ පියා ඊයේ (07) අත්අඩංගුවට ගත් බව දිඹුල
පතන පොලිසියේ ස්ථානාධිපති ප්‍රධාන පොලිස් පරීක්ෂක ආනන්දසිරි මහතා පැවසීය.
දිඹුල පතන පොලිස් වසමේ වතුයායක පිහිටි බිරියගේ නිවෙසේ පදිංචිව සිටින 33 හැවිරිදි සැකකාර පියා ඉකුත් 05 වැනි දින රාත්‍රියේ නිවෙසේදී තම අවුරුදු 09 සහ 05 වන දරුවන් දෙදෙනාට පහර දී ඇති බවත්, සැකකරුගේ බිරිය ගෘහ සේවය සඳහා විදේශගතව ඇති බවත් පොලිස් ස්ථානාධිපතිවරයා කියා සිටියේය. දරුවන් දෙදෙනා මිත්තණිය භාරයේ සිට ඇති අතර, සැකකරු කොළඹ ප්‍රදේශයේ වාහන පිරිසිදු කිරීමේ මධ්‍යස්ථානයක සේවය කරන අයකු බවත්, දරුවන් දෙදෙනා පියාගේ උපදෙස් නොපිළිපදින බැවින් සැකකරු දරුවන් දෙදෙනාට අතින් පහරවල් කිහිපයක් ගසා ඇති බවට දැනට කරන ලද මූලික පරීක්ෂණවලදී අනාවරණය වී ඇත.
සැකකරු ලිඳුල පොලිස් වසමට අයත් නාගසේන ප්‍රදේශයේ පිහිටි ඔහුගේ නිවෙසේ දරුවන් දෙදෙනා සමඟ රැඳී සිටියදී අත්අඩංගුවට ගෙන සැකකරු සහ දරුවන් දෙදෙනා වැඩිදුර විමර්ශන කටයුතු සඳහා දිඹුල පතන පොලිසිය වෙත භාර දී තිබේ. ලිඳුල පොලිසිය සැකකරු අත්අඩංගුවට ගෙන ළමුන් දෙදෙනා පොලිස් භාරයට ගත් අවස්ථාවේ ළමුන් නිරාහාරව සිටි බැවින් ළමුන් දෙදෙනාට ආහාර පාන ලබා දීමට ලිඳුල පොලිසියේ නිලධාරීන් පියවර ගෙන තිබිණ. පොලිස් භාරයට ගත් දරු දෙදෙනා දික්ඔය මූලික රෝහලේ අධිකරණ වෛද්‍යවරයා වෙත යොමු කර සැකකරු හැටන් මහේස්ත්‍රාත් අධිකරණය වෙත ඉදිරිපත් කරන බව දිඹුල පතන පොලිසියේ ස්ථානාධිපතිවරයා වැඩිදුරටත් පැවසීය.
හැටන් – රංජිත් රාජපක්ෂ
