බදුල්ල ශික්ෂණ රෝහලේ නේවාසිකව ප්‍රතිකාර ලබමින් සිටි තරුණ රෝගියකු රෝහලේ මානසික සුවය ඒකකයේ තෙමහල් ගොඩනැඟිල්ලකින් බිමට පැන සියදිවි නසා ගැනීමට ගත් උත්සාහයක් බදුල්ල රෝහලේ ප්‍රධාන ආරක්ෂක නිලධාරියා විසින් වළක්වාගෙන රෝගියා බේරාගත් බව බදුල්ල රෝහලේ හදිසි ප්‍රතිකාර ඒකකයේ ජ්‍යෙෂ්ඨ වෛද්‍ය නිලධාරී වෛද්‍ය පාලිත රාජපක්ෂ මහතා ඊයේ (16)පැවසීය. මේ සද්ක්‍රියාව කරමින් රෝගීයාගේ ජීවිතය බේරාගෙන ඇත්තේ බදුල්ල ශික්ෂණ රෝහලේ රාජකාරි කරන රෝහලේ ප්‍රධාන ආරක්ෂක නිලධාරි ඩබ්ලිව්.වී.අජිත් ප්‍රිය වැලිවිට මහතාය.
මඩොල්සිම ප්‍රදේශයේ පදිංචි 35 හැවිරිදි තරුණයකු කිසියම් රෝගී තත්ත්වයක් හේතුවෙන් බදුල්ල ශික්ෂණ රෝහලේ නේවාසිකව ප්‍රතිකාර ලබමින් සිට ඇති අතර ඔහුගේ වයෝවෘද්ධ මව සහ පියා පමණක් නිවසේ සිට ඇති බවත් හෙතෙම කීය. මේ රෝගි පුතා රෝහලේ නේවාසිකව ප්‍රතිකාර ලබමින් සිටින විටදි නිවසේ සිටි වයෝවෘද්ධ මව සහ පියා රැකබලා ගැනිමට කිසිවකු නැති නිසා සහ ඔවුන්ට කන්න නැතිව බඩගින්නේ නිවසේ පසුවෙන හෙයින් මව්පියන් ගැන දුක සිතා සිත් තැවුලට පත්ව මෙසේ තමා රෝහලේ තෙමහල් ගොඩනැඟිල්ලෙන් බිමට පැන සියදිවි හානි කර ගැනීමට උත්සාහ කළ බව පැවසූ බව වෛද්‍ය පාලිත රාජපක්ෂ මහතා සඳහන් කළේය. බදුල්ල රෝහලේ මානසික සුවය ඒකකයේ තෙමහල් ගොඩනැඟිල්ල උඩ රෝගියකු ජනේලයෙන් පිටතට පැමිණ එහි උඩ සිට බිමට පැනීමට යන බව දැනගත් ඒකකයේ හෙද හෙදියන් රෝහල් කාර්ය මණ්ඩලය සහ රෝහලේ ප්‍රධාන ආරක්ෂක නිලධාරී ඩබ්ලිව්.වී.අජිත් ප්‍රිය වැලිවිට මහතා වහා ක්‍රියාත්මක වී රෝගියා නිරුපද්‍රිතව බේරාගත් බව බදුල්ල රෝහලේ හදිසි ප්‍රතිකාර ඒකකයේ ජ්‍යෙෂ්ඨ වෛද්‍ය නිලධාරී වෛද්‍ය පාලිත රාජපක්ෂ මහතා වැඩිදුරටත් පැවසීය.
(ජායාරූප සොරණාතොට සමුහ සී ගමගේ )
