කන්දකාඩු පුනරුත්ථාපන මධ්‍යස්ථානය ස්ථාපිත කර ඇති ප්‍රදේශය, දුෂ්කර ප්‍රදේශයක් වන බැවින් පහසුකම්වලින් යුත් ප්‍රදේශයකට එම මධ්‍යස්ථානය ගෙන යාමට ඇති හැකියාව පිළිබඳව සොයා බලන ලෙස අධිකරණ බන්ධනාගාර කටයුතු හා ආණ්ඩුක්‍රම ව්‍යවස්ථා ප්‍රතිසංස්කරණ අමාත්‍ය ජනාධිපති නීතිඥ, ආචාර්ය විජයදාස රාජපක්ෂ මහතා පුනරුත්ථාපන කාර්යාංශයේ ඉදිරි ක්‍රියාමාර්ග පිළිබඳව පසුගියදා (13) අධිකරණ අමාත්‍යාංශයේදී පැවති විශේෂ සාකච්ඡාවකදී නිලධාරින්ට උපදෙස් ලබා දී තිබේ.
කන්දකාඩු පුනරුත්ථාපන මධ්‍යස්ථානයේ පසුගිය කාලයේ ඇති වූ සිද්ධීන් පිළිබඳව මෙහිදී ඇමැතිවරයාගේ අවධානය යොමු වී තිබේ. කන්දකාඩු පුනරුත්ථාපන මධ්‍යස්ථානයේ ආරක්ෂාව සඳහා යොදවා සිටින ආරක්ෂක නිලධාරීන් වැඩි කිරීම, පුනරුත්ථාපනලාභීන්ගේ මානසික තත්ත්වය ඉහළ නැංවීම, එම මධ්‍යස්ථානවල පරිපාලන කටයුතු, ඔවුන්ට ලබා දෙන පුහුණුවීම් පිළිබඳව මෙහිදී ඇමැතිවරයාගේ දැඩි අවධානය යොමු වී තිබේ.
කන්දකාඩු පුනරුත්ථාපන මධ්‍යස්ථානය තුළ පසුගිය කාලසීමාවේදී වූ සිද්ධීන් ඉදිරියට ඇති නොවීමට වග බලා ගත යුතු බවත්, පුනරුත්ථාපන ක්‍රියාවලිය තවදුරටත් විධිමත් කළ යුතු බවත්, අධිකරණ අමාත්‍යතුමන් මෙහිදී අවධාරණය කර තිබේ. දැනට මෙරට පුනරුත්ථාපන මධ්‍යස්ථානවල පවතින පරිපාලන දුර්වලතා මඟ හරවා ගැනීමට පුහුණුව සහිත නිලධාරීන් බඳවා ගැනීමට අවශ්‍ය අනුමැතිය දැනටමත් ලබා දී ඇති බැවින් ඔවුන් බඳවා ගැනීමට කටයුතු කළ යුතු බවත්, පිළිගත් ජාත්‍යන්තර නීති රීති සහ ප්‍රඥප්තීන්ට පටහැණි නොවන ආකාරයෙන් මෙරට පුනරුත්ථාපන ක්‍රියාවලිය සිදු විය යුතු බවත් අධිකරණ ඇමැතිවරයා මෙහිදී පෙන්වා දුන්නේය.
එමෙන්ම මෙහිදී අධිකරණ අමාත්‍යවරයා පුනරුත්ථාපන කාර්යාංශ කවුන්සිලයට උපදෙස් ලබා දී ඇත්තේ මෙරට පුනරුත්ථාපන ක්‍රියාවලියේ පවතින අඩුපාඩු නිවැරදි කිරීම සඳහා අවශ්‍ය යෝජනා කඩිනමින් ඉදිරිපත් කිරීමට හා පුනරුත්ථාපනය සම්බන්ධයෙන් පවතින නීති සහ රෙගුලාසි අවශ්‍ය පරිදි සංශෝධනය කිරීමට කටයුතු කරන ලෙසය. අධිකරණ හා බන්ධනාගාර කටයුතු රාජ්‍ය අමාත්‍ය නීතිඥ, අනුරාධ ජයරත්න, ආරක්ෂක රාජ්‍ය අමාත්‍ය, ප්‍රමිත බණ්ඩාර තෙන්නකෝන්, ආරක්ෂක ලේකම් විශ්‍රාමික ජෙනරාල්, කමල් ගුණරත්න, අධිකරණ අමාත්‍යාංශයේ ලේකම් එම්. එන්. රණසිංහ, පුනරුත්ථාපන කොමසාරිස් ජනරාල්, විශ්‍රාමික මේජර් ජනරාල්, දර්ශන හෙට්ටිආරච්ච්, බන්ධනාගාර කොමසාරිස් ජනරාල්, තුෂාර උපුල්දෙණිය, පුනරුත්ථාපන කාර්යාංශ කවුන්සිලයේ සභාපති, ජනාධිපති නීතිඥ යූ. ආර්. ද සිල්වා, මහත්වරුන්, අධිකරණ අමාත්‍යාංශය, මහජන ආරක්ෂක අමාත්‍යාංශය, පොලිසිය, නීතිපති දෙපාර්තමේන්තුව, පුනරුත්ථාපන කොමසාරිස් කාර්යාංශය, පුනරුත්ථාපන කාර්යාංශ කවුන්සිලය, මානව හිමිකම් කොමිෂන් සභාව, බන්ධනාගාර දෙපාර්තමේන්තුව හා ශ්‍රී ලංකා යුද හමුදාව ඇතුළු රාජ්‍ය ආයතන නියෝජනය කරමින් උසස් නිලධාරීහු පිරිසක් මෙම සාකච්ඡාවට එක්ව සිටියහ.
