ශ්‍රී ලංකාව හා ඇෆ්ගනිස්තානය අතර රංගිරි දඹුලු ක්‍රීඩාංගණයේ පැවැති අවසන් විස්සයි 20 තරගයේ අවසන් පන්දු ඕවරයේදී ඇතිවූ ‘නෝබෝල්’ සිද්ධිය සම්බන්ධයෙන් විනිසුරු ලින්ඩල් හැනිබල් ප්‍රසිද්ධියේ විවේචනය කළ නායක වනිඳු හසරංගට දඬුවම් පමුණුවන්නේද? නැද්ද? යන තීරණය ජාත්‍යන්තර ක්‍රිකට් කවුන්සිලය අද ලබාදීමට නියමිතය. යම් හෙයකින් මේ චෝදනාවට අදාළව වනිඳු හසරංගට තරග තහනමක් පැනවුවහොත් විස්සයි20 ලෝක කුසලාන තරගාවලියට පෙර ශ්‍රී ලංකාව සහභාගි වන බංග්ලාදේශ තරගාවලිය ඔහුට අහිමි වේ.
කෙසේ වුවද මේ තරගයේදී ‘නිපන්දුව’ ලබා නොදීමෙන් වරදක් කළ විනිසුරුවන්ට දඬුවමක් ලබාදීමට අයිසීසීය පියවර නොගැනීම සම්බන්ධයෙන් විවිධ පාර්ශ්ව චෝදනා එල්ල කරමින් සිටිති. අයිසීසී ක්‍රිකට් නීති අනුව ‘පන්දු යවන්නකු විසින් යවන ලද බිම පතිත නොවන පන්දුවක්, පිතිකරණ රේඛාව පසු කරද්දී පිතිකරුගේ ඉණට ඉහළින් නම් එය නිපන්දුවක් වන්නේය’ ලෙස සඳහන් වන බැවින් කමිඳු මෙන්ඩිස්ගේ සිද්ධිය අනුව විනිසුරු පැහැදිලිවම වරදක් කොට ඇත. එවැනි පන්දුවක් ගමන් කිරීමේදී ‘ලෙග් අම්පයර්ගේ’ සහාය ලබා ගැනීම සිදුවන අතර, නිපන්දුව සංඥා කිරීමේ වගකීම විනිසුරුවන් දෙදෙනාගෙන් කුමන හෝ කෙනෙකු සිදු කළ යුතුය.
ශ්‍රී ලංකාව ලැබූ පරාජයෙන් පසු ක්‍රීඩා පිටියේදී මතභේදාත්මක ලෙස විනිසුරු ලින්ඩල් හැනිබල් විවේචනය කිරීම සම්බන්ධයෙන් නායක වනිඳු හසරංගට ජාත්‍යන්තර ක්‍රිකට් කවුන්සිලයේ (ICC) ආචාර ධර්ම කඩකළ බවට චෝදනා එල්ල විය. හසරංගගේ හැසිරීම සම්බන්ධයෙන් විනිසුරු ලින්ඩල් හැනිබල් තරග තීරක එංගලන්ත ජාතික ක්‍රිස් බ්‍රෝඩ් මහතා වෙත පැමිණිල්ලක් ඉදිරිපත්කොට ඇති අතර ඒ සම්බන්ධ පරීක්ෂණයක් ආරම්භ විය. එම පරීක්ෂණයේ ප්‍රතිඵලය ශ්‍රී ලංකා ක්‍රිකට් කවුන්සිලය වෙත අද දිනයේ ලබා දීමට නියමිතව ඇතැයි පැවසේ.
තරගයෙන් අනතුරුව හසරංගගේ හැසිරීම අයිසීසී චර්යාධර්ම සංග්‍රහය යටතේ වරදක් බවට චෝදනා කරමින් තරග විනිසුරු චෝදනා එල්ල කර තිබූ අතර, හසරංගගේ පෙර වැරදිවලින් වාර්තාවී ඇති වැරදි ලකුණු ද මේ තීන්දුව ලබාදීමේදී ගණනය කිරීමට තීරණය වී ඇත.
වනිඳු මෙයට පෙර 2022 වසරේදී ඇෆ්ගනිස්තානය සමඟ තරගයකදී නජිබුල්ලා සද්‍රාන් කඩුල්ල මුවා කිරීමේ වරදට හසුවූවකු ලෙස පිටියේ විනිසුරු දැවී යෑම සටහන් කළ ද, තෙවැනි විනිසුරු විසින් එය නොදැවීමක් ලෙස තහවුරු කළේය. එහිදී වනිඳු එම තීරණයට සිය විරුද්ධත්වය ප්‍රකාශ කරමින් එම තීරණය පෙන්වූ රූපවාහිනී තිරයට සිය දෑත් දික් කිරීම වරදක් ලෙස තීරණය කොට වනිඳුගේ විනය වාර්තාවට එක් අසාදු ලකුණු එක් කළේය.
එවිට පිටියේ විනිසුරුවන් වූ නිටින් මෙනන්, ලින්ඩන් හැනිබල් දෙදෙනාත්, තෙවැනි විනිසුරු වූ රවීන්ද්‍ර විමලසිරි සහ සිවුවැනි විනිසුරු වූ රුචිර පල්ලියගුරුගේ යන මහත්වරු පැමිණිලි කළහ.
