පාර්ලිමේන්තුවෙන් විශාල කාර්යභාරයක් සිදු වුවත් එම කරුණු සමාජගත නොවීම කනගාටුවට කරුණක් බව නියෝජ්‍ය කථානායක අජිත් රාජපක්ෂ මහතා ප්‍රකාශ කරයි.
ඒ මහතා මේ බව පැවැසුවේ පසුගියදා බදුල්ලේදී පැවති රැස්වීමකදීය.
එහිදී වැඩිදුරටත් අදහස් දැක්වූ ඒ මහතා මෙලෙස ද කීවේය.
“රටේ ඉදිරිය සහ සමාජයේ ප්‍රගමනය වෙනුවෙන් වැදගත් අණ පනත් රැසක් සම්මත වුවත් එම කරුණු ගැන සමාජයේ අ‍ව‍බෝධයක් නෑ. එහිදී ජනමාධ්‍ය ආයතන තම වගකීම නිසියාකාරව ඉටු කරනවාද කියා එම ආයතන විසින් අවධානය යොමු කිරීමට කාලය එළැඹ තිබෙනවා.
පාර්ලිමේන්තුවේ විවාදවල සිදු වන වැදගත් කරුණු, සංඛ්‍යා ලේඛන, නව නීති සම්පාදන, රෙගුලාසි සහ නියාමන ඇතුළු අණ පනත් සහ ඒවා රටට, සමාජයට, රටේ පොදු මහජනතාවට බලපාන ආකාරය ගැන පුළුල් සංවාදයක් ඇති නොකර පාර්ලිමේන්තුවේ සිදු වන කෑ කෝ ගැසීම් පිළිබඳව පමණක් මාධ්‍ය අවධානය යොමු කිරීම මේ තත්ත්වයට ප්‍රධාන හේතුවක්.
පාර්ලිමේන්තුව මේ රටේ තියෙන උත්තරීතරම ආයතනය. මාධ්‍ය තුළයි, සමාජය තුළයි අපේ ආගමට දහමට ගහනවා වගේම මේ රටේ තියෙන ප්‍රජාතන්ත්‍රවාදය ඉහළින්ම තියෙන ආයතනයට තමයි ගහන්නෙ. විවිධ මානසික මට්ටම් තියෙන මිනිස්සු අපි ඕනෙ තරම් දැකලා තියෙනවා. ඉතාමත් හොඳ හදවතක් තියෙන මහ පොළොවේ පය ගහලා මිනිස්සු වෙනුවෙන් කටයුතු කරන ගොඩක් අය ඉන්නවා. හැබැයි ඒ අයට ගරහන්නෙ මළ ගෙදරකට සීනි පන්සීයක් ගෙනිහින් දීපු නැති අය. පාර්ලිමේන්තුවෙන් වෙන වැඩ දන්නේ අපේ සමාජයේ ටික දෙනයි. හැබැයි සමහර වෙලාවට ප්‍රවෘත්තිවලට විනාඩි 5ක් 6ක් ඇතුළත පෙන්වන ටිකක් තමයි අපේ රටේ ජනතාව දන්නෙ. නමුත් පාර්ලිමේන්තුව කියන්නෙ උදේ 9.30ට රැස් වුණාම සවස 6, 7 වෙනකම් සමහර වෙලාවට රෑ වෙනකම් වැඩ කරන තැනක්. ප්‍රවෘත්ති බලනකොට රණ්ඩු වෙන ටික විතරමයි මාධ්‍යයෙන් පෙන්වන්නේ. එතකොට හිතනවා මේක වැඩක් නෑ කියලා.”
