තංගල්ල පළතුඩුව ප්‍රදේශයේදී රාත්‍රී පොලිස් මුර සංචාරයේ යෙදුණු පොලිස් නිලධාරින් දෙදෙනෙකුට පහර දී, රාජකාරියට බාධා කළ විශ්‍රාමික යුද හමුදා සෙබළෙකු තංගල්ල පොලිස් ස්ථානයේ නිලධාරීන් විසින් පෙරේදා (25) රාත්‍රි 11.00ට පමණ අත්අඩංගුවට ගෙන තිබේ.
මෙලෙස පොලිස් අත්අඩංගුවට ගෙන ඇත්තේ වෛද්‍ය හේතූන් මත විශ්‍රාම ගන්වා ඇති පළතුඩුව, තංගල්ල පදිංචි 39 හැවිරිදි යුද හමුදා සෙබළෙකි.
සැකකරු අධික ලෙස බීමත්ව කලහකාරී ලෙස හැසිරීම සම්බන්ධයෙන් අසල්වැසියෙකු විසින් 119 පොලිස් හදිසි ඇමතුම් අංශයට මේ බව දන්වා තිබේ. ඒ අනුව රාත්‍රී මුර සංචාරයේ යෙදී සිටි පොලිස් නිලධාරීන් කණ්ඩායමක් එම ස්ථානයට ගොස් සැකකරු අත්අඩංගුවට ගැනීමට උත්සාහ කළ අවස්ථාවේ සැකකරු පොලිස් නිලධාරින් දෙදෙනෙකුට පහර දී රාජකාරියට බාධා කර තිබේ. සැකකරු සිදු කළ පහර දීම හේතුවෙන් රාත්‍රී මුර සංචාරයේ යෙදී සිටි පොලිස් සැරයන් (59795) කරුණාරත්න හා පොලිස් කොස්තාපල් (75474) සුසන්ත යන නිලධාරීන් දෙදෙනා සුළු තුවාල ලබා ප්‍රතිකාර සඳහා තංගල්ල මූලික රෝහලට ඇතුළත් කර තිබේ. සැකකාර පුද්ගලයා පොලිස් නිලධාරීන් විසින් එම අවස්ථාවේදීම අත්අඩංගුවට ගෙන ඇති අතර, එහිදී සැකකරු පරීක්ෂා කිරීමේදී ඔහුගේ යට කලිසමේ සඟවාගෙන සිටි ගංජා ග්‍රෑම් 10ක්ද පොලිස් නිලධාරීන් සොයාගෙන ඇත. අත්අඩංගුවට පත් සැකකරු අධික ලෙස බීමත්ව සිට ඇති අතර, සැකකරු තංගල්ල මහේස්ත්‍රාත් අධිකරණයට ඉදිරිපත් කිරීමට නියමිතය. තංගල්ල කොට්ඨාස භාර ජ්‍යෙෂ්ඨ පොලිස් අධිකාරී කේ.බී. කීර්තිරත්න මහතාගේ උපදෙස් පරිදි තංගල්ල මූලස්ථාන පොලිසිය වැඩිදුර පරීක්ෂණ පවත්වයි.
