මීගහවත්ත, කටුකුරුන්ද ප්‍රදේශයේ කුලී පදනම මත ලබා ගත් නිවෙසක කසිප්පු බෝතල් 50ක්, ගෝඩා බැරල් 03ක් සහ පෙරීමේ උපකරණ ළඟ තබාගෙන කසිප්පු පෙරීමේ කටයුතුවල නිරතව සිටි පුද්ගලයකු සැකපිට අත්අඩංගුවට ගත් බව මීගහවත්ත පොලිසිය පවසයි. රාගම, මත්තුමගල ප්‍රදේශයේ පදිංචි වයස අවුරුදු 45ක පුද්ගලයකු මෙසේ අත්අඩංගුවට ගැනීමට පොලිසියට හැකි වී තිබේ.
පොලිසියට ලැබුණ තොරතුරක් විමර්ශනය කර මීගහවත්ත පොලිසියේ දූෂණ මර්දන අංශයේ නිලධාරීන් මෙම වැටලීම සිදු කර සැකකරු අත්අඩංගුවට ගෙන තිබේ.
සැකකරු මෙම ප්‍රදේශයේ පෙරන කසිප්පු වත්තල, ජා ඇළ, කඳාන සහ රාගම වැනි ප්‍රදේශවලට බෙදාහැර ඇති බවට පොලිසිය සිදු කළ මූලික විමර්ශනවලදී හෙළි වී තිබේ.
මෙම සැකකරු කාලයක සිට ප්‍රදේශයේ විවිධ ස්ථානවල මෙම කසිප්පු පෙරීමේ ජාවාරම් කටයුතු සිදු කර ගෙන ගොස් ඇති අතර, මෙම සැකකරුට එරෙහිව මීගමුව සහ වැලිසර යන අධිකරණවල මත්ද්‍රව්‍ය ජාවාරම් කිරීමේ නඩු පවරා ඇති බවට තොරතුරු අනාවරණය වී ඇති බව පොලිසිය පවසයි.
සැකකරු මහර මහේස්ත්‍රාත් අධිකරණයට ඉදිරිපත් කිරීමට කටයුතු යොදා තිබේ.
