බඩල්ගම බලවල පාලම ආසන්නයේ කුඩා ඔයේ මසුන් මහා පරිමාණයෙන් මීය ගොස් ඇත්තේ ඔක්සිජන් අඩු වීම නිසා බව ජල ජීවී වගා සංවර්ධන අධිකාරිය සඳහන් කරයි.
බලවල පාලම පසුකර මද දුරක් ගිය පසු කුඩා ඔය, මා ඔය හා එක්වෙන අතර ඉකුත් 20 අලුයම සිට එහි සිටි මසුන් දහස් ගණනින් මියගොස් පාවෙන්නට පටන් ගෙන තිබිණි.
විශාල වශයෙන් මසුන් මිය යෑම කිසියම් වසක් මිශ්‍රවීම හේතුවෙන් සිදු වී ඇති බවට ජනතාව අතර අදහස් පැපැතිරෙමින් තිබිණි. ජල ජීවී වගා සංවර්ධන අධිකාරිය, දිවුලපිටිය සෞඛ්‍ය වෛද්‍ය නිලධාරි කාරයාලයේ මහජන සෞඛ්‍ය පරීක්ෂකවරුන් ඇතුළු නිලධාරීන් පොලිසිය හා එක්ව සිද්ධිය වූ ස්ථානයේ නිරීක්ෂණය කර ජල සම්පල් ආදිය ලබා ගනු ලැබීය.
ජල ජීවී වගා සංවර්ධන අධිකාරියේ සංවර්ධන නිලධාරි තරිදු කසුන් මහතා මෙහිදී පැවසුවේ මසුන්ට ජලය හිඟ වීම නිසා ඔක්සිජන් ලබා ගැනීමට අපහසු වීම මත මේ තත්ත්වය උදාවී ඇතැයි අනුමාන කරන බවය.
ජලය හිඟ වීමත් සමඟ ඔක්සිජන් ප්‍රමාණය ලබා ගැනීම අපහසු වීමෙන් මේ තත්ත්වය උදා විය හැකි බවත් වහා ජලය සැපයීමෙන් පිළිසරණක් ලබාගත හැකි විය හැකි බවද ඔහු සඳහන් කළේය.
බඩල්ගම පොලිස් ස්ථානාධිපති පොලිස් පරීක්ෂක ජයන්ත පතිරණ මහතා උප පොලිස් පරීක්ෂක ඩබ්ලිව්. එම්. ඩබ්ලිව්. එදිරිසිංහ මහතා ඇතුළු නිලධාරීහු ද පරීක්ෂණ කටයුතු සඳහා එක්ව සිටියහ.
