බේරුවල ආරියවංශ විදුහලට සති අන්තයේ නිවාඩු දිනක ඇතුළු වී ඇති කිසියම් සොරකු විදුහලේ සුහුරු පරිගණක පංති කාමරය කඩා එහි තිබූ රුපියල් 780,000ක් වටිනා ටැබ් පරිගණක 13ක් සොරකම් කර ඇතැයි බේරුවල පොලිසිය පැවසීය.
පාසලේ විදුහල්පතිවරයා පෙරේදා (25) කිසියම් අවශ්‍යතාවයකට පාසලට පැමිණි අවස්ථාවේ මෙම සිද්ධිය දැක බේරුවල පොලිසිට පැමිණිලි කිරීමෙන් අනතුරුව ඒ සම්බන්ද විමර්ශන ආරම්භ කර ඇතැයි බේරුවල පොලිසිය කියා සිටියේය. මෙම පරිගණක පංති කාමරයේ ටැබ් යන්ත්‍ර 25ක් තිබී ඇති අතර, එම සොරා ඉන් ටැබ් 13ක් පමණක් සොරකම් කර තිබෙන බව බේරුවල පොලිසිය කීය. සිද්ධිය වූ දින රජයේ නිවාඩු දිනයක් වීම හේතුවෙන් එම අවස්ථාවේ පාසල් මුරකරු ද සිට නොමැති බව පොලිසිය වැඩිදුරටත් සඳහන් කළේය.
සහකාර පොලිස් අධිකාරී දුමින්ද රාජපක්ෂ, බේරුවල පොලිස් ස්ථානාධිපති ප්‍රධාන පොලිස් පරීක්ෂක ලලිත් පත්මකුමාර යන මහත්වරුන්ගේ උපදෙස් මත උප පොලිස් පරීක්ෂක හියුබට් සිල්වා, පොලිස් කොස්තාපල් වටවල (70628) යන මහත්වරු විමර්ශන සිදු කරති.
