ආර්ථික විද්‍යාඥයකු වීමේ සිහිනය සැබෑ කර ගැනීමට එංගලන්තයේ කේම්බ්‍රිජ් විශ්වවිද්‍යාලයට ඇතුළත් වී සිටි අල්විස් පවුලේ සුරතලා වූ 16 හැවිරිදි ඩිනාල් ද අල්විස් 2022 වසරේ ඔක්තෝබර් මාසයේ එක්තරා දිනෙක රාත්‍රියේ කාටත් හොර රහසේ නිවෙසින් බැහැරව ගොස් සිය මපියන්ට කෙටි පණිවුඩයක් එව්වේය. ඩිනාල්ගේ සොහොයුරන් දෙදෙනාට ද ඔහුගෙන් එවැනි කෙටි පණිවුඩ ලැබිණි. ‘මම ඕගොල්ලන්ට ගොඩාක් ආදරෙයි. අම්මවයි තාත්තාවයි හොඳින් බලාගන්න.’
එදින රාත්‍රියේ නිවෙසින් බැහැරව ගිය ඩිනාල් නැවත නොපැමිණි අතර, ලන්ඩන් නුවර වොලිංටන් හි සට්න් ප්‍රදේශයේ පදිංචිව සිටි කෞෂල්‍ය ද අල්විස් කෙටි පණිවිඩය ලද මොහොතේදි ම සිය පුත්‍රයාගේ ‘ස්නැප් චැට්’ සමාජ මාධ්‍ය ජාලා ගිණුමට පිවිස සොයා බලද්දී ඔහු දිවි නසාගැනීමට උත්සාහ කරන බව හැඟවෙන වීඩියෝ පටයක් දැක ගැනීමට ලැබිණි. ඩිනාල්ගේ අතුරුදන්වීම සහ ඔහු දිවි හානි කර ගැනීමේ උත්සාහයක නිරත වන බව ඔහු එවෙලේම පොලිසියට දැනුම් දුන්නේය.
පොලිසිය ඔහු සොයා මොහොතකින් පරීක්ෂණ ආරම්භ කළ අතර, ඊට මොහොතකට පසු සට්න් ප්‍රදේශයේ පදිංචිකරුවකු පොලිසියට දුරකතන ඇමතුමක් දුන්නේය. සිය රාත්‍රි රාජකාරි අවසන් කර ආපසු නිවෙස බලා යමින් සිටි එම පුද්ගලයා පොලිසියට කියා සිටියේ එක්තරා ගොඩනැඟිල්ලක් අසල 
තරුණයකු බිම වැටී සිටින බවය. වහා එම ස්ථානයට ගිය පොලිස් නිලධාරින් ගිලන් රථයක් කැඳවා ඔහුගේ සිරුර රෝහල කරා ගෙන ගියේය. සීසීටීවී දර්ශන පරීක්ෂා කිරීමේදී තරුණයා ගොඩනැඟිල්ලට ඇතුළුවන ආකාරය සහ ඉහළ සිට පහළට පනින ආකාරය පොලිසියට දැකගත හැකි විය. හිස් කබලට සහ මොළයට සිදු වූ බරපතළ හානිය ඒ වනවිටත් තරුණයාගේ ප්‍රාණය නිරුද්ධ කර තිබිණි. ඩිනාල් ද අල්විස් ගොඩනැඟිල්ලේ ඉහළ සිට බිමට පැන අවාසනාවන්ත ලෙස සිය දිවි හානි කරගෙන තිබුණේ එසේය.
ලන්ඩන් සාමාන්‍ය පෙළ විභාගයෙන් සියලු විෂයයන් සඳහා විශිෂ්ඨ සමාර්ථ ලැබූ මේ දීප්තිමත් සිසුවාට දිවි හානි කර ගැනීමට තරම් හේතුවක් නොතිබිණි. ඉංග්‍රීසි විෂයට ඔහු උපන් හපනකු විය. අධ්‍යාපනයට මෙන්ම ක්‍රීඩාවට ද ඔහු අති දක්ෂයෙකි.
‘ඩිනාල් අපි ගොඩාක්ම ආදරය කළ පුතා.’ කෞෂල්‍ය එසේ කීවේ හැඬූ කඳුළින් යුතුවය. ඔහුගේ මරණය අල්විස් පවුලට ගෙන දුන්නේ දැඩි වේදනාවකි. එයා පාසලේ අධ්‍යාපනයෙන් වගේම ක්‍රීඩාවෙනුත් කැපී පෙනුණු දරුවෙක්. ආර්ථික විද්‍යාවටයි, ඉංග්‍රීසි භාෂාවටයි පන්තියේ වැඩිම ලකුණු ගත්තේ එයා. අපි ලංකාවේ ඉඳලා මෙහේ ආවේ දරුවන්ගේ අනාගතය ගැන හිතලයි. පුතා පාසලේ පාපන්දු කණ්ඩායමේ වගේම රග්බි කණ්ඩායමෙත් ක්‍රීඩා කළා. කවදාවත් කිසිම දෙයක් ඉල්ලලා වද දුන්නේ නෑ. නිතරම හරි සතුටින් හිටියේ. කෞෂල්‍ය ද අල්විස් සිය ආදරණීය පුත්‍රයා ගැන මතකය අවදි කළේ කඳුළු අතරිනි. ‘පුතාගේ මරණය අපිට ලොකු වේදනාවක්. ඒක හිතාගන්න බැරි මරණයක්. අපි එයාට ආදරේට කිවුවේ ගෝල්ඩන් බෝයි කියලයි. මේ විදිහට එයා දිවි හානි කරගනියි කියලා අපි කවදාවත් හිතුවේ නෑ.’
පොලිස් පරීක්ෂණ ආරම්භ වූ අතර ඩිනාල්ගේ මරණයේ සැබෑ පුවත් අනාවරණය වූයේ පසුගියදාය.
ඩිනාල් එවැනි අවාසනාවන්ත ඉරණමකට ගොදුරු වී ඇත්තේ එක්තරා මිනිසකු කප්පම් මුදල් ඉල්ලා කරනු ලැබූ තර්ජනයක් හේතුවෙන් බව මෙට්‍රොපොලිටන් පොලිස් විමර්ශකයන් සොයා ගෙන තිබේ. එය සිදු වී ඇත්තේ ඔහුගේ ස්නැප් චැට් සමාජ මාධ්‍ය ජාලා ගිණුම ඔස්සේය. නයිජීරියානු ජාතිකයකු බව පොලිසිය සැක කරනු ලබන මිනිසා ඩිනාල්ගේ ගිණුම තුළින් නිරුවත් ඡායාරූප දෙකක් සොරා ගෙන තිබේ. ඩිනාල්ගේ පියා සඳහන් කර ඇත්තේ එම ඡායාරූප ඩිනාල්ගේ මිතුරියක ගත් ඒවා විය හැකි බවය.
‘ඩිනාල්ට මිතුරියන් කිහිපදෙනෙක් හිටියා. එයා හරි විවෘතයි’ කෞෂල්‍ය පොලිසියට එසේ ප්‍රකාශ කර තිබිණි. එහෙත් කිසිවකු නොදැකිය යුතු එම ඡායාරූප අවසානයේ වැරදි අතකට පත් වී තිබේ.
‘මට පවුම් 100ක් එවන්න. නැතිනම් මේ ෆොටෝ මම ඔයාගේ ස්නැප් චැට් යාළුවෝ හැමෝටම යවනවා’ තර්ජනය එය විය.
‘ඒ පින්තුර හැමෝම දකීවි කියලා එයා බය වෙන්න ඇති. අනේ එයා ඊට කලින් අපිට කතා කරලා මේ විස්තර කිවුවා නම්… කෞෂල්‍ය පසුතැවිල්ලෙන් යුතුව එසේ කීවේය.
ඩිනාල් බිය ගන්වා කප්පම් මුදල් ඉල්ලා සිටි පුද්ගලයා ඒ සඳහා වීපීඑන් තාක්ෂණය භාවිත කර ඇති බැවින් ඔහු සිටින ඉසව්ව නිශ්චිතව සොයා ගත නොහැකි බව පොලිසිය සඳහන් කර තිබේ. ඔහු නයිජීරියාවේ සිට ඩිනාල් සමඟ සම්බන්ධ වන්නට ඇතැයි පොලිසිය අනුමාන කළේය.
‘ඩිනාල් පුතා හැම සමාජ මාධ්‍ය ජාලයේම ඉන්නවා. එයා නිතරම ඒවා පාවිච්චි කරනවා. අපි එයාට අවවාද කරලත් තිබුණේ. තරුණ අය සමාජ මාධ්‍ය ජාලයේ ඇති අනතුරුදායක බව අවතක්සේරුවට ලක් කරනවා. ඒත් ඇත්තටම ඒවායේ හරි භයානක දේවල් සිද්ධ වෙනවා. මවුපියන් හැටියට අපි මීට වඩා දරුවන් ගැන සැලකිලිමත් වෙන්න ඕනෑ. මගේ පුතාට සිදු වුණු දේ වෙන කාටවත් වෙන්න එපා’ කෞෂල්‍ය ද අල්විස් එසේ කියා සිටියේය.
