පුරාණ චාරිත්‍රානුකූලව සිංහල සහ දමිළ අලුත් අවුරුද්දට යෙදී තිබෙන හිසතෙල් ගැල්වීමේ නැකැත් චාරිත්‍රය ඉටු කරන හිසතෙල් ගැල්වීමේ රාජ්‍ය මහෝත්සවය අප්‍රේල් මස 15 වැනි දින පූර්වභාග 10.17ට ගම්පහ දිස්ත්‍රික්කයේ හැදල, වත්තල පුරාණ රාජමහා විහාරයේදී පූර්ණ රාජ්‍ය අනුග්‍රාහකත්වයෙන් පැවැත්වෙන බව දේශීය වෛද්‍ය රාජ්‍ය ඇමැති, නීතිඥ සිසිර ජයකොඩි මහතා පැවැසීය.
ඒ සඳහා විහාරාධිපති, ශාස්ත්‍රපති හිග්ගොඩ චන්දිම හිමිපාණන් වෙත දැහැත් පිළිගන්වමින් සාම්ප්‍රදායික චාරිත්‍රානුකූල ආරාධනාව සිදු කිරීම රාජ්‍ය ඇමැතිවරයා විසින් පෙරේදා (27) සිදු කෙරිණි.
දේශීය වෛද්‍ය රාජ්‍ය අමාත්‍යාංශය සහ ආයුර්වේද දෙපාර්තමේන්තුවේ සංවිධායකත්වයෙන් විහාරයේ දායක සභාව, ගම්පහ දිස්ත්‍රික් ලේකම් කාර්යාලය, වත්තල ප්‍රාදේශීය ලේකම් කාර්යාලය, නගර සභාව, මාධ්‍ය ආයතන, ආරක්ෂක අංශ, ජල සම්පාදන හා විදුලි බල මණ්ඩලය ඇතුළු සියලු ආයතන ඒකරාශී කර ගනිමින් මේ රාජ්‍ය මහෝත්සවය සාර්ථකව සිදු කිරීම පිළිබඳ එහිදී විශේෂ සාකච්ඡාවක් පැවැත්විණි.
එම අවස්ථාවට දේශීය වෛද්‍ය රාජ්‍ය අමාත්‍යාංශයේ අතිරේක ලේකම් චන්දන තිලකරත්න, ආයුර්වේද කොමසාරිස් ජනරාල් ධම්මික අබේගුණවර්ධන, වත්තල ප්‍රාදේශීය ලේකම් පී. ඩී. ටී. සී. රාජිකා, වත්තල මාබෝල නාගරික ලේකම් පී. ඒ. එස්. එස්. සඳරුවන් මහත්ම මහත්මීහු සහභාගී වූහ.
