ගිරිඋල්ල මදීනා මුස්ලිම් මධ්‍ය මහා විද්‍යාලයේ විදුහල්පති තනතුරට පත් වූ ශ්‍රී ලංකා විදුහල්පති සේවයේ පළමු ශ්‍රේණියේ යූ. එම්. එම්. අමීර් මහතාට එම තනතුරේ වැඩ භාර ගැනීමට නොදී වැඩ ආවරණය සඳහා යෙදවූ නිලධාරියා තනතුරේ සිටීමෙන් පාසලේ ගැටලුකාරී තත්ත්වයක් උද්ගත කර ඇතැයි ලංකා විදුහල්පති සංගමයේ ප්‍රධාන ලේකම් පියසිරි ප්‍රනාන්දු මහතා ‘දිනමිණ’ට පැවැසීය.
මේ පිළිබඳව වැඩිදුරටත් අදහස් දැක්වූ ප්‍රධාන ලේකම්වරයා මෙලෙස ද කීවේය.
“පාසලේ විදුහල්පති තනතුර සඳහා පත් කළ යුත්තේ ශ්‍රී ලංකා විදුහල්පති සේවයේ පළමු ශ්‍රේණියේ සුදුසුකම්ලත් නිලධාරියෙක්. දැනට වැඩ ආවරණයට පත්කර ඇත්තේ පරිපාලන සේවයේ නිලධාරියෙක්. ඒ අනුව සුදුසුකම්ලත් නිලධාරියාට වැඩ භාර ගැනීමට නොදී පාසලේ ඒකාධිකාරයක් ගොඩනැඟී තිබෙනවා. එය නීතියට පටහැනියි.
සමන්තුරෙයි කලාප කාර්යාලයේ පරිපාලන සේවයේ නියුතු එස්. එම්. හයිදර් අලී මහතා පසුගිය වසරේ මාර්තු මාසයේ වැඩ ආවරණ විදුහල්පති තනතුරට පත්කර ඇත්තේ එම තනතුරට අදාළව සුදුසුකම්ලත් විදුහල්පතිවරයකු පත් කරන තෙක්.
ජාතික පාසල්වලට විදුහල්පතිවරුන් තෝරා පත් කර ගැනීම සඳහා 2023 සැප්තැම්බර් මස 08, 09, 13, 15, 21 දිනවල පැවැත්වූ සම්මුඛ පරීක්ෂණයේ ප්‍රතිඵල අනුව කු/ මදීනා මුස්ලිම් මධ්‍ය මහා විද්‍යාලයේ විදුහල්පති තනතුරට රාජ්‍ය සේවා කොමිෂන් සභාවේ අධ්‍යාපන සේවා කමිටුවෙන් ශ්‍රී ලංකා විදුහල්පති සේවයේ එක ශ්‍රේණියේ යූ. එම්. එම්. අමීර් මහතා පත් කර ඇති බව අධ්‍යාපන අමාත්‍යාංශයේ ලේකම් වසන්තා පෙරේරා මහත්මියගේ අත්සනින් යුත් ලිපියක් යොමුකර තිබියදීත් වැඩ ආවරණය සඳහා යෙද වූ විදුහල්පතිවරයා තවමත් තනතුරේ රැඳී සිටීම ගැටලුකාරී තත්ත්වයක්. නීතියට අනුව පියවර ගනිමින් මේ පාසලේ ඇති ගැටලුව ඉක්මනින් විසඳාගත යුතුයි. නො එසේ නම් පාසල් පද්ධතියට එය වැරදි ආදර්ශයක්.”
