හිටපු ඉන්දීය අග්‍රාමාත්‍ය රජිව් ගාන්ධි මහතා ඝාතනයට වරදකරුවකු වී පසුව නිදහස ලැබූ යාපනයේ ශාන්තන් නමැත්තා ඉන්දියාවේ රජිව් ගාන්ධි රෝහලේදී පෙරේදා (27) මියගොස් තිබේ. වසර 32කට පසුව සිය මව බැලීමට යාපනයට පැමිණීමට නියමිතව සිටියදී ඔහුට හදිසියේ වැලඳුණු අක්මා රෝගයක් හේතුවෙන් රෝහල්ගතකොට සිටි අතර පසුව මියගොස් ඇත.
ශාන්තන්ගේ මව විසින් ඉන්දීය රජයට ඉදිරිපත් කරන ලද අභියාචනයක් සැලකිල්ලට ගැනීමෙන් පසුව ඉන්දීය රජයේ අනුමැතිය මත චෙන්නායිහි ශ්‍රී ලංකා නියෝජ්‍ය මහකොමසාරිස් කාර්යාලය විසින් ශාන්තන්ට ඉන්දියාවෙන් ශ්‍රී ලංකාවට පැමිණීම සඳහා විදෙස් ගමන් බලපත්‍රයක් නිකුත් කොට තිබිණි.
හිටපු අගමැති රජිව් ගාන්ධි ඝාතන නඩුවේ ජීවිතාන්තය දක්වා සිරදඬුවම් නියම වූ නාලිනී, මුරුගන් සහ ශාන්තන් ඇතුළු හත් දෙනා 2022 නොවැම්බර් මාසයේදී නිදහස් කරන ලදි. නිදහස් කරන ලද හත්දෙනා අතරින් මුරුගන් සහ ශාන්තන් ට්‍රිචි විශේෂ කඳවුරේ රඳවා තබන ලද අතර අනෙක් පස්දෙනාට ඔවුන්ගේ ඥාතීන් වෙත යෑමට අවසරය ඉන්දීය රජයෙන් හිමිවිණි.
