නිවස පිටුපස වැසිකිළිය තුළ වැටී පුද්ගලයකු මිය ගොස් සිටියදී පෙරේදා (27) සොයා ගත් බව බුලත්සිංහල පොලිසිය පවසයි.
මෙසේ මියගොස් ඇත්තේ අමරගෙදර, බුලත්සිංහල ලිපිනයේ පදිංචි එම්. ජී. රංජිත් නමැති 54 හැවිරිදි දෙදරු පියෙකි. සිද්ධිය වූ දින උදේ මෙම පුද්ගලයා නිවසේ තනිව සිට ඇති අතර බිරිඳ අසල වත්තක තේ දලු කැඩීමට ගොස් තිබේ. බිරිඳ කීප අවස්ථාවක දුරකතනයෙන් ඔහුට කතා කර ඇති අතර ඔහුගෙන් කිසිදු පිළිතුරක් නොවූ තැන ඇය පැමිණ ඔහු පිළිබඳ සොයා බලා තිබේ. නිවස තුළ නොසිටි බැවින් ඇය අවට කැලෑ ප්‍රදේශවලද සොයා බලා පසුව නිවස පිටුපසට ගොස් බැලීමේදී දොරක් නොමැති වැසිකිළිය තුළ ඔහු වැටී සිට ඇති බව දැක තිබේ.
එදින 11.30 ට පමණ ඔහු පුද්ගලයකුට දුරකතනයෙන් කතා කර ඇති අතර බිරිඳට ඔහු වැටී සිටියදී හමුවී ඇත්තේ සවස 2.00ට පමණ බව පොලිසිය පවසයි. බුලත්සිංහල හදිසි මරණ පරීක්ෂක චිරාත් භාරත මහතා ස්ථානීය පරීක්‍ෂණ සිදු කළ අතර හොරණ දිස්ත්‍රික් මහ රෝහලේ අධිකරණ වෛද්‍ය නිලධාරිනි එස්. එස්. සිල්වා මහත්මිය පශ්චාත් මරණ පරීක්ෂණය සිදු කළාය. ඉදිරිපත් වූ සාක්ෂි සහ වෛද්‍ය වාර්තා අනුව මෙම මරණය හෘදයාබාධයක් හේතුවෙන් සිදු වූ මරණයක් බවට බුලත්සිංහල හදිසි මරණ පරීක්ෂක චිරාත් භාරත මහතා නිගමනය කළේය.
