මිනුවන්ගොඩ අධ්‍යාපන කලාපයේ පාසල් 160හි ගුරු පුරප්පාඩු 722ක් පවතින බව ගුරු සංගම් ප්‍රකාශ කරයි.
මිනුවන්ගොඩ අධ්‍යාපන කලාපය, මීරිගම කොට්ඨාසයේ පාසල් 54ක්, දිවුලපිටිය කොට්ඨාසයේ පාසල් 55ක් සහ මිනුවන්ගොඩ කොට්ඨාසයේ පාසල් 51කින් සමන්විත වන අතර, මෙම ගුරු පුරප්පාඩු හමුවේ පාසල් දරුවන්ගේ අධ්‍යාපන කටයුතුවලට දැඩි ලෙස බාධා පැමිණෙන බවද ගුරු සංගම් සඳහන් කරති.
මේ පිළිබඳව මිනුවන්ගොඩ කලාප අධ්‍යාපන අධ්‍යක්ෂ වජිර රණරාජා පෙරේරා මහතා පැවසුවේ අධිකරණ නියෝගයක් මත ඇනහිට පවතින ගුරුවරුන් බඳවාගැනීමේ කටයුතු සිදු වීමෙන් පසු මේ තත්ත්වය වළක්වාගත හැකි වන බවයි.
එමෙන්ම මේ වන විට සංවර්ධන නිලධාරීන් 650ක පමණ පිරිසක් මෙම පාසල්වල සේවය සඳහා යොදවා ඇති අතර, ඔවුන්ගෙන් අවශ්‍ය කටයුතු ආවරණය කර ගැනීමට කටයුතු කරන බවත්, ගුරුවරුන් 350ක පමණ පිරිසකගේ සේවය ලැබෙන්නේ නම් මෙම පුරප්පාඩු තත්ත්වය නොසලකා දරුවන්ට හොඳ සේවාවක් ලබා දීමට හැකි වන ඇති බවත් ඒ මහතා වැඩිදුරටත් පැවසුවේය.
