දින දෙකක සිට දඹුල්ල වීර ඩෙන්සිල් කොබ්බැකඩුව රෝහලට ජල පහසුකම් නොමැතිවීම හේතුවෙන් බාහිර රෝගීන්, නේවාසික රෝගීන්, වෛද්‍යවරු ඇතුළු රෝහල් සේවකයෝ දැඩි අසීරුතාවයට පත්ව ඇති බව රෝගීහු පවසති.
දඹුල්ල මූලික රෝහලේ නේවාසිකව ප්‍රතිකාර ලබන රෝගීන් ඊයේ (28) උදෑසන කියා සිටියේ මේ වන විට වැසිකිළි පහසුකම් සපයා ගැනීමට ජල හිඟය උග්‍ර ලෙස බලපා නේවාසික රෝගීන්, සේවකයන් දැඩි අසීරුතාවකට පත්ව තිබෙන බවය. නේවාසික රෝගීන් ඇඳන්වලින් බැසීමට හැකි අය අවට නගරයේ පොදු වැසිකිළි පද්ධතියට, නිවාසවලට මෙන්ම වෙළෙඳසල්වලට ගොස් තම අවශ්‍යතාව ඉටුකර ගැනීම අලුයම් කාලයේ සිට සිදු කළ බවය. ඇවිද ගැනීමට සහ දුර ගමන් කිරීමට නොහැකි රෝගීන් තම අපහසුතාව විඳ දරාගෙන දැඩි පීඩනයකට ලක්ව සිටින බව ඔවුහු පවසති.
දඹුල්ල මූලික රෝහලේ සේවක සේවිකාවන් කියා සිටියේ පෙරේදා (27) පෙරවරුවේ සිට ඊයේ (28) පෙරවරුව දක්වාම ජල සැපයීම නැවතී ඇත්තේ ජලාපවාහන මණ්ඩලයේ ජල නළ පද්ධතියේ නඩත්තු කිරීමක් නිසාවෙන් බවය. දඹුල්ල ජලාපවාහන මණ්ඩලයේ නඩත්තු කරන කටයුත්තක් හේතුවෙන් මෙම තත්ත්වය උදා වී තිබෙන බව පෙන්වා දුන්නද මෙවැනි හදිසි අවස්ථාවක් සිදු වුවහොත් ඊට විකල්ප ක්‍රම භාවිත කිරීම සඳහා කිසිඳු පියවරක් නොගැනීම බලවත් කනගාටුවක් බව රෝගීහු පෙන්වා දෙති. පානීය ජලය කෙසේ හෝ සපයා ගත්තද වැසිකිළි කැසිකිළි පහසුකම් රෝහල පවිත්‍ර කටයුතු සිදු කිරීම් අත්‍යාවශ්‍ය කාරණා සඳහා ජලය නොමැතිවීම බරපතළ ප්‍රශ්නයක් බව සේවකයන් හා ජනතාව ද පෙන්වා දෙති.
දිනකට විශාල රෝගීන් පිරිස් බාහිර සායන සහ නේවාසිකව ප්‍රතිකාර ලබන වීර ඩෙන්සිල් කොබ්බෑකඩුව රෝහලේ පවතින මෙම බරපතළ ප්‍රශ්නය පිළිබඳව සොයා බැලීම සඳහා ගිය අපට රෝගීන් තම අපහසුතාව පෙන්වා දෙන්නට වූහ.
රෝහල් ප්‍රකාශකයින් කියා සිටියේ ආහාර පිසීම, ආපනශාලා පවත්වාගෙන යෑම සහ සම්පූර්ණයෙන්ම දෛනික කටයුතුවලට ජලය නැතිවීම බරපතළ ලෙස බැඳෙන බවය.
රෝහල් බලධාරීන් සඳහන් කළේ දඹුල්ලේ ජලාපවාහන මණ්ඩලයට දැනුම් දී තිබෙන බවත් ඔවුන් කඩිනමින් අලුත්වැඩියා කොට ජලය ලබා දීමට කටයුතු කරන බවට දැනුම් දී ඇති බවය.
අප නඩත්තු කරන ස්ථානයට ගොස් සොයා බැලීමකදී දැකගැනීමට හැකි වූයේම දවස් දෙකේදීම නළ පද්ධතිය අලුත්වැඩියා කිරීම් කටයුතු දිවා රෑ නොබලා සේවකයන් විසින් සිදු කරන බවය.
කෙසේ වෙතත් එහි නඩත්තු කටයුතු අවසන් කර ගැනීමට නොහැකි වී තිබේ. දඹුල්ල ජලාපවාහන මණ්ඩලයේ නඩත්තු නිලධාරීවරයෙකු කියා සිටියේ මෙම හදිසි බිඳ වැටීම දැනගත් මොහොතේම ජලය රැස් කර තබා ගන්නා ලෙස දැනුම් දීමකින් අනතුරුව මෙම නඩත්තු කටයුතු ආරම්භ කළ බවය. කඩිනමින් අවශ්‍ය ස්ථානයට ජලය ලබා දීම සඳහා කටයුතු අවසන් කිරීමට උත්සහා කරන බව ද සඳහන් කළේය.
