රජයේ සහනාධාර වැඩසටහන යටතේ බදුල්ල දිස්ත්‍රික්කයේ කුඩා තේවතු හිමියන් 35000ක් සඳහා අවශ්‍ය පොහොර වර්ග සහන මිලට ලබාදීම මේ වන විට ආරම්භ කර ඇතැයි ද මාර්තු මස 31 වැනිදා තෙක් සහනාධාර පොහොර නිකුත් කෙරෙන බව ද කුඩා තේ වතු සංවර්ධන අධිකාරිය පවසයි.
මේ යටතේ වෙළෙඳපොළෙහි රුපියල් 11,800ක් වන පොහොර මිටියක් රුපියල් 7950ක මිලට ලබා දෙන බව ද මේ සම්බන්ධයෙන් බදුල්ල දිස්ත්‍රික් කෘෂිකර්ම කමිටුව දැනුම්වත් කරමින් කරුණු දැක්වූ කුඩා තේ වතු සංවර්ධන අධිකාරියේ ඌව ප්‍රාදේශීය කළමනාකාරවරයා සඳහන් කළේය.
ඒ අනුව තේ පොහොර සහනාධාර වැඩපිළිවෙළ යටතේ ටී- 200 හා ටී-750 යන පොහොර වර්ග මිටියක් රුපියල් 5700 බැගින් ද යූ-709 හා යූ- 834 පොහොර මිටියක් රුපියල් 7950 බැගින් ද තේ තවාන් සඳහා භාවිත කරන ටී- 65 පොහොර මිටියක් රුපියල් 8500 බැගින් ද කුඩා තේ වතු සංවර්ධන සමිති හරහා ලබා දෙන බවත් මේ සඳහා පොහොර මෙට්‍රික් ටොන් 1278ක් වෙන්කර ගෙන ඇති බවත් ඒ මහතා පැවැසීය.
