හාලිඇළ, ශ්‍රී බිම්බාරාම විහාරස්ථානය සහ බෝගහමඩිත්ත ශ්‍රී ජේතවනාරාම විහාරස්ථානයට පෙරේදා (27) අලුයම ඇතුළු වී ඇති සොරකල්ලියක් විහාරස්ථානවල තිබූ පිංකැට දෙකක් කඩා විහාරස්ථානයේ ආවාස ගෙයි තිබූ මුදල්, ආරක්ෂිත කැමරා උපකරණ කට්ටල ඇතුළු රුපියල් 97000ක් පමණ වටිනා දේපළ සොරාගෙන ගොස් ඇතැයි හාලිඇළ පොලිසිය පවසයි.
ශ්‍රී බිම්බාරාම විහාරස්ථානය වසා තිබියදී දොරේ ඉබ්බා කඩා ආවාස ගෙට ඇතුළු වී ඇති සොරුන් එහි තිබූ මුදල් රුපියල් 67000ක් ද, විහාරස්ථානයේ ආරක්ෂිත කැමරා පද්ධතියේ රුපියල් 25000ක් වටිනා ඩී. වී. ආර්. යන්ත්‍රය ද ගලවා සොරාගෙන විහාරගෙයි තිබූ පිංකැටය ද මෙසේ කඩා දමා ඇති බවත් පොලිසිය පැවැසීය.
මේ අතරතුරේ හාලිඇළ, බෝගහමඩිත්ත ශ්‍රී ජේතවනාරාම විහාරස්ථානයේ වාකවුළුවකින් විහාරස්ථානයේ විහාරගෙට ඇතුළු වී ඇති සොරුන් එහි පිංකැටය ද කඩා මුදල් රුපියල් 5000ක් පමණ සොරාගෙන ගොස් ඇතැයි ද පොලිසිය සඳහන් කරයි. එම පිංකැටය විහාරස්ථානයේ චෛත්‍යය ආසන්නයේ දමා ගොස් තිබියදී සොයාගත් බව ද පොලිසිය පැවැසීය. එකම දින රාත්‍රී කාලයේ සිදු වූ මෙම සොරකම් සම්බන්ධයෙන් මෙතෙක් කිසිවෙකු අත්අඩංගුවට ගෙන නොමැති බව ද හාලිඇළ පොලිසිය පැවැසීය.
ඌව පළාත් භාර නියෝජ්‍ය පොලිස්පති සම්පත් කුමාර ලියනගේ, බදුල්ල ජ්‍යෙෂ්ඨ පොලිස් අධිකාරි වසන්ත කන්දේවත්ත, පොලිස් අධිකාරි පී. එම්. ජයරත්න යන මහත්වරුන්ගේ උපදෙස් මත හාලිඇළ පොලිස් ස්ථානාධිපති පොලිස් පරීක්ෂක රුවන් ගුණතිලක, උපපොලිස් පරීක්ෂක උපාලි බණ්ඩාර, පොලිස් සැරයන් (1477) ජයසිංහ, (54167) ලාල්, (39403) ඒකනායක යන මහත්වරුන් ඇතුළු නිලධාරීහු වැඩිදුර පරීක්ෂණ පවත්වති.
