සුරා බදු නීති රීතිවලට පටහැණිව පයාගල ප්‍රදේශයේ අලුතෙන් මත්පැන්හලක් විවෘත කිරීමේ සූදානමක් පවතින බවත් ඊට ප්‍රදේශවාසීන්ගේ විරෝධයක් එල්ල වී ඇති බවත් කළුතර දිස්ත්‍රික් පාර්ලිමේන්තු මන්ත්‍රී රෝහිත අබේගුණවර්ධන මහතා කළුතර දිස්ත්‍රික් සම්බන්ධීකරණ කමිටු රැස්වීමේදී ප්‍රකාශ කළේය.
කමිටු සම සභාපති සංජීව එදිරිමාන්න මහතාගේ ප්‍රධානත්වයෙන් කළුතර දිස්ත්‍රික් ලේකම් කාර්යාලයීය ශ්‍රවණාගාරයේදී මෙම රැස්වීම පැවැත්විණි.
එහිදී තවදුරටත් අදහස් දැක්වූ මන්ත්‍රීවරයා මෙසේ ද කීය.
Òමෙම ස්ථානයට සමීපව කතෝලික දේවස්ථාන, පාසල් මෙන්ම තවත් ආගමික ස්ථානද පවතිනවා. පවතින මහජන විරෝධය හමුවේ මෙම මත්පැන්හලට අවසර ලබා නොදෙන ලෙස ඉල්ලනවා.
නිවාස සහ නාගරික සංවර්ධන ඇමැති ප්‍රසන්න රණතුංග මහතා :
ව්‍යාපෘති ක්‍රියාත්මක කිරීමේදී ග්‍රාමීය කමිටුව කැඳවා ප්‍රමුඛතා හඳුනාගත යුතුයි. එහි අනුමැතියෙන් තොරව කිසිදු ව්‍යාපෘතියක් ක්‍රියාත්මක කරන්න එපා.
මෙහිදී දහම් පාසැල්වලට වැඩි අවධානයක් යොමු කරන්න. වැඩිහිටි සංවිධාන, යෞවන සමාජ, ක්‍රීඩා සමාජ ආදියෙහි අවශ්‍යතා හඳුනාගෙන ප්‍රතිපාදන වෙන් කරන්න. එහෙත් මුදල් වෙන් කළ යුත්තේ ජූලි මස 31 දිනට පෙර අවසන් කළ හැකි ව්‍යාපෘතිවලට පමණයි.
වැඩ නොකරන කොට ජනතාව බනින්නේ වැඩ කරන්නේ නැහැ කියල. වැඩ කරනකොට කියන්නේ කොමිස් ගහනවා කියල. කමිටුවලට ගමේ අය පත් කර ගත්තාම ඒ අයටම බලා ගන්න පුළුවන්.
දැන් පළාත් පාලන මැතිවරණය සඳහා නාමයෝජනා ලබා දී ඇති අය කමිටුවට කැඳවන්න එපා කියල කියනවා. එහෙම බැරි දිසාපතිතුමාටයි. කමිටු සභාපති හැටියට සංජීව එදිරිමාන්න මහතාට කැඳවන්න පුළුවන්. කළුතර දිස්ත්‍රික්කයේ අයව කැඳවන්නේ නැහැ කියල මම දැන ගත්තේ මෙහෙ ආවාට පසුවයි. අපි නම් කැඳවනවා.
රටේ අවශ්‍යතාවය අනුව ව්‍යාපෘති ක්‍රියාත්මක කිරීමට යනවිට ඇතැම් නිලධාරීන් බැහැ කියනවා. පළාත් සභා චක්‍රලේඛයේ ගැටලුවක් ඇති බව සමහරු කියනවා. පළාත් සභා චක්‍රලේඛය ද මධ්යම රජයේ චක්‍රලේඛය ද පිළිගන්නේ කියල තීරණය කරන්න ආණ්ඩුකාරවරයාට පුළුවන්. ඒ ඒ ප්‍රාදේශීය ලේකම් කොට්ඨාසවලට ගැළපෙන පරිදි ව්‍යාපෘති හඳුනාගත යුතුයි.
සමෘද්ධි රාජ්‍ය ඇමැති අනූප පැස්කුවල් මහතා ;
ඉස්සර නම් රසකැවිලි හදන වංගෙඩියටත් ප්‍රතිපාදන වෙන් කරල තිබුණා. සමහරුන්ගේ හදන්න සිමෙන්ති දුන්නාම විකුණා ගත්තා. පුහුණුවක් ලබාදී කරන ඒවාට ප්‍රශ්නයක් නැහැ.
ධීවර රාජ්‍ය ඇමැති පියල් නිශාන්ත මහතා :
ඇළ මාර්ග සුද්ද කරනවා කියලා වැඩිපුර හෑරුවොත් ඇළවල් දිගේ කරදිය ගලා ගිහින් වගාවන් විනාශ වෙනවා. අද ඉත්තෑපාන ප්‍රදේශයේ වගා කිරීමට නොහැකි වී තිබෙනවා.
කළුතර දිස්ත්‍රික් පාර්ලිමේන්තු මන්ත්‍රී ලලිත් වර්ණකුමාර මහතා ද කළුතර දිස්ත්‍රික් ලේකම් ප්‍රසන්න ගිනිගේ මහතා ඇතුළු නිලධාරීහු රැසක් ද මෙහිදී අදහස් දැක්වූහ.
