ශ්‍රී ලංකා ගුවන් හමුදාවේ 73 වැනි සංවත්සරයට සමගාමීව වාර්ෂිකව සංවිධාන කරනු ලබන ගුවන් හමුදා පාපැදි සවාරිය මාර්තු මස 3 වැනිදා සිට 7 දක්වා දින පහක් පුරා පැවැත්වේ. මෙවර 25 වැනි ගුවන් හමුදා පාපැදි සවාරිය කොළඹ සිට යාපනය දක්වා පැවැත්වෙන පළමු අවස්ථාව ලෙස ඉතිහාසයට එක් වෙයි.
ජයග්‍රාහක ජයග්‍රාහිකාවන්ට රුපියල් මිලියන 2.5ක මුදල් තෑගි බෙදා දෙන මේ තරගය ශ්‍රී ලංකා පාපැදි තරග දින දර්ශනයේ ප්‍රමුඛතම තරගය වන අතර ඊට නිපෝන් පේන්ට් සමාගමේ ප්‍රධාන අනුග්‍රාහකත්වය ලැබී තිබේ.
තරගකරුවන් 200කට ආසන්න පිරිසක් සහභාගි වනු ඇතැයි අපේක්ෂා කරන ගුවන් හමුදා පාපැදි තරගය පිළිබඳ මාධ්‍ය හමුව පසුගියදා බත්තරමුල්ලේ ගුවන් හමුදා මූලස්ථානයේදී පැවති අතර එහි දී අදහස් පළ කළ ගුවන් හමුදා පාපැදි කමිටුවේ ලේකම් ගෲප් කපිතාන් රංග පෙරේරා කියා සිටියේ දේශීය තරගකරුවන්ට අමතරව ඉන්දීය ගුවන් හමුදාවේ තරගකරුවන් පිරිසකට ද තරගය සඳහා ඇරියුම් කර ඇති බවය.
පිරිමි තරගයේ සම්පූර්ණ දුර ප්‍රමාණය කිලෝමීටර් 654ක් වන අතර මාර්තු මස 3 වැනිදා කොළඹ සිට මහනුවර දක්වා කිලෝමීටර් 104. 3ක දුරක් ආවරණය කරමින් තරගය ආරම්භ වේ. අනතුරුව 4 වැනිදා මහනුවර සිට පොලොන්නරුව දක්වා කිලෝමීටර් 137.2ක දුරක් ආවරණය කෙරෙන අතර 5 වැනිදා පොලොන්නරුවේ සිට ත්‍රිකුණාමලය දක්වා කිලෝමීටර් 125.7කින් ද, 6 වැනිදා ත්‍රිකුණාමලය සිට වවුනියාව දක්වා කිලෝමිටර් 139.4කින්ද, අවසන් දිනයේදි වවුනියාවේ සිට යාපනය දක්වා කිලෝමීටර් 147.4කින් ද තරගය සමන්විතය.පිරිමි තරගයට සමගාමීව පැවැත්වෙන කාන්තා තරගය මාර්තු මස 7 වැනිදා මාන්කුලම් සිට යාපනය දක්වා කිලෝමීටර් 98ක දුරකින් යුතුව පැවැත්වීමට නියමිතය. මෙවර තරගයේ ජයග්‍රාහකයාට මුදලින් රුපියල් ලක්ෂ 5ක් හිමිවන අතර, දෙවැනි ස්ථානයට රුපියල් ලක්ෂ 3ක් ද, තුන්වැනි ස්ථානයට රුපියල් ලක්ෂ 2ක් ද, සිව්වැනි ස්ථානයට රුපියල් එක්ලක්ෂ විසිපන්දහසක් ද පිරිනැමීමට කටයුතු යොදා තිබේ. පස්වැනි ස්ථානයේ සිට 25 වැනි ස්ථානය දක්වා ද මුදල් තෑගි පිරිනැමීම විශේෂත්වයකි. මීට අමතරව සමස්ත ස්ප්‍රින්ට් ශූරතාව, කඳු තරණයේ ජයග්‍රහණ, අදියර ත්‍යාග, සමස්ත කණ්ඩායම් ශූරතාව සහ අවුරුදු 23න් පහළ දක්ෂතම යොවුන් ක්‍රීඩකයා වශයෙන් තවත් මුදල් තෑගි රැසක්ම ප්‍රදානය කිරීමට නියමිතය.
කාන්තා තරගයේ ජයග්‍රාහිකාවට රුපියල් එක්ලක්ෂ විසිපන්දහසක මුදල් ත්‍යාගයක් පිරිනැමෙන අතර දෙවැනි ස්ථානයට රුපියල් අසූදහසක් සහ තුන්වැනි ස්ථානයට රුපියල් හැට දහසක මුදල් තෑගි පිරිනැමේ. මීට අමතරව සිව්වැනි ස්ථානයේ සිට 10 වැනි ස්ථානය දක්වා ද මුදල් තෑගි පිරිනැමෙන අතර සමස්ත ස්ප්‍රින්ට් ශූරතාව, කණ්ඩායම් ශූරතාව වෙනුවෙන් ද මුදල් තෑගි වෙන් කර තිබේ.
