ඇල්පිටිය පොලිස් වසමට අයත් ජම්බුගහහේන ප්‍රදේශයේ තිබී අතහැර ගිය වැගන් ආර් වර්ගයේ මෝටර් රථයක් සොයා ගත් බව ඇල්පිටිය පොලිසිය පවසයි.
පෝද්දල පොලිස් වසමෙන් මෝටර් රථයක් පැහැරගෙන යන බවට ලද පොලිස් පණිවුඩයක් අනුව ඇල්පිටිය හා ඌරගස්මංහන්දිය පොලිස් ස්ථානවල පොලිස් කණ්ඩායම් දෙකක් අද (01) අලුයම 4.30ට පමණ පරීක්ෂණ පවත්වමින් සිටියදී මෝටර් රථය පැහැරගෙන ඇල්පිටිය – අලුත්ගම ප්‍රධාන මාර්ගයේ ඌරගස්මංහන්දිය දෙසට ධාවනය වෙමින් තිබූ බවට තොරතුරු ලැබී ඇති අතර, මෙම මෝටර් රථය නවදගල, ජම්බුගහහේන ප්‍රදේශයේ කන්දක දමා කොල්ලකරුවන් පැනගොස් ඇති බව පොලිසිය පවසයි. මෝටර් රථයේ දකුණු පැත්තේ පිටුපස ටයරයක් ගැලවී ඇති අතර එම ටයරය ද මෙතෙක් හමුවී නැත. එම ටයරය වේගයෙන් ධාවනය කිරීමේදී කැඩී ගොස් ඇති බවයි පොලිසිය විශ්වාස කරන්නේ. මෝටර් රථය අතහැර ඒ ආසන්නයේ ඇති කුරුඳු ඉඩමකට පැන කොල්ලකරුවන් පලා ගොස් ඇති බවට පොලිසිය සැක කරයි.
මෙම මෝටර් රථය පෝද්දල ප්‍රදේශයෙන් පැහැරගෙන එමින් සිටියදී රත්ගම ප්‍රදේශයේදී මුර සංචාරක පොලිස් කණ්ඩායමක් විසින් නවතා පරීක්ෂා කරමින් සිටියදී මොවුන් පලාගොස් ඇති බව ද පොලිස් ආරංචිමාර්ග කියයි.
ඇල්පිටිය මූලස්ථාන ප්‍රධාන පොලිස් පරීක්ෂක අනුර විජේසිංහ මහතාගේ උපදෙස් මත අපරාධ අංශයේ ස්ථානාධිපති පොලිස් පරීක්ෂක ඉන්ද්‍රජිත් වැල්ලගේ මහතා ඇතුළු පොලිස් කණ්ඩායමක් වැඩිදුර පරීක්ෂණ පවත්වති.
