ජල සම්පත සුරක්ෂිත කිරීමට ජල ප්‍රතිපත්තියක් සැකසීමට යෝජනා වුව ද කිසිවිටෙක ගොවිතැන් කටයුතු සඳහා කිසිදු ජල බද්දක් අය නොකරන බව වාරිමාර්ග ඇමැති පවිත්‍රා වන්නිආරච්චි මහත්මිය සඳහන් කළාය.
ඇමැතිනිය මේ බව ප්‍රකාශ කළේ පෙරේදා (29) අනුරාධපුර දිස්ත්‍රික් ලේකම් කාර්යාලයේ පැවැති අනුරාධපුරය, පොලොන්නරුව, ත්‍රිකුණාමලය, මන්නාරම සහ වව්නියාව දිස්ත්‍රික් පහක ගොවි සංවිධාන නියෝජිතයන් සමඟ පැවැති රැස්වීමකට සහභාගි වෙමිනි.
රටට බත සපයන ගොවි ජනතාවගෙන් ජල බද්දක් අය කිරීමට රජයේ කිසිදු අපේක්ෂාවක් නැති බව වාරිමාර්ග, වනජීවි සහ වන සංරක්ෂණ ඇමැතිනී නීතිඥ පවිත්‍රා වන්නිආරච්චි මහත්මිය අවධාරණය කරයි.
රටේ ජල සම්පත සුරක්ෂිත කිරීමට ජල ප්‍රතිපත්තියක් සැකසීම සඳහා යෝජනාවක් ඉදිරිපත් වී ඇති බවත් එම ප්‍රතිපත්තිය සකස් කිරීම අද හෙට සිදුවන්නක් නොවන බවත් එය සකස් කිරීමට දීර්ඝ කාලයක් ගතවන අතර, ඒ සඳහා විවිධ අංශ කෙරෙහි අවධානය යොමු කරමින් කළ යුතු ගැඹුරු ක්‍රියාවලියක් බවත් හෙතෙම පෙන්වා දුන්නාය. වාරිමාර්ග, වනජීවි සහ වන සංරක්ෂණ ක්ෂේත්‍රයේ ගොවි ගැටලු විසඳීම සඳහා මේ රැස්වීම කැඳවා තිබුණ අතර, ඒ සඳහා අනුරාධපුරය, පොලොන්නරුව, ත්‍රිකුණාමලය, මන්නාරම සහ වව්නියාව දිස්ත්‍රික්කවලට අයත් ගොවි සංවිධාන නියෝජිතයෝ සහභාගි වූහ. එහිදී ගොවි සංවිධාන නියෝජිතයන් ඉදිරිපත් කළ ප්‍රශ්නයකට පිළිතුරු දෙමින් ඇමැතිනී පවිත්‍රා වන්නිආරච්චි මහත්මිය කියා සිටියේ ගොවි ජනතාවට සිය ගොවිබිම් සඳහා ලබාදෙන ජලය වෙනුවෙන් බද්දක් අය කිරීමට රජය කිසිදු තීරණයක් ගෙන නොමැති බවයි. රජය එවැනි තීරණයක් ඉදිරියට ද නොගන්නා බව තමා වගකීමෙන් ප්‍රකාශ කරන බව ද පවිත්‍රා වන්නිආරච්චි මහත්මිය අවධාරණය කළාය. මේ සාකච්ඡාවේදී ගොවි සංවිධාන නියෝජිතයන් විසින් වාරි ඇළ මාර්ග නඩත්තු කටයුතු, වන සතුන්ගෙන් වන වගා හානි, විදුලි වැට ඉදිකිරීම් සහ නඩත්තු කිරීම්, වී මිල, පොහොර සහනාධාර මුදල් ප්‍රමාදවීම් ඇතුළු වාරිමාර්ග, වනජීවි සහ වන සංරක්ෂණ අංශයේ ගැටලු සම්බන්ධයෙන් පුළුල්ව සාකච්ඡා කෙරිණි.
ජායාරූප – අනුරාධපුර අතිරේක
