මෙරට ජාතික පොහොර ප්‍රතිපත්තියට කාබනික පොහොර භාවිතය ඇතුළත් කළ යුතු බව ආහාර සුරක්ෂිතතාව හා කෘෂිකර්මය පිළිබඳ ආංශික අධීක්ෂණ කාරක සභාවේ සභාපති පාර්ලිමේන්තු මන්ත්‍රි ඩී. වීරසිංහ මහතා ප්‍රකාශ කළේය.
කෙටි, මධ්‍යකාලීන හා දිගුකාලීන ජාතික ප්‍රතිපත්ති සැකසීමේදී ප්‍රමුඛතා හඳුනාගැනීම පිළිබඳ ජාතික සභාවේ අනු කමිටුව විසින් සකස් කරන ලද ආහාර සුරක්ෂිතතාව සඳහා වන සංකල්පමය ප්‍රතිපත්ති ද ආහාර සුරක්ෂිතතාව හා කෘෂිකර්මය පිළිබඳ ආංශික අධීක්ෂණ කාරක සභාවේදී සලකා බලන ලද අතර සැලැස්ම සඳහා එම කාරක සභාව විසින් සංශෝධන කිහිපයක් ඇතුළත් කිරීමට යෝජනා කර ඇත.
ආහාර සුරක්ෂිතතාව හා කෘෂිකර්මය පිළිබඳ ආංශික අධීක්ෂණ කාරක සභාව ඒ මහතාගේ සභාපතිත්වයෙන් පසුගියදා පාර්ලිමේන්තුවේදී රැස්වූ අතර එහිදී මේ සම්බන්ධයෙන් සාකච්ඡා විය. කාබනික පොහොර භාවිතය සම්බන්ධයෙන් ගොවීන් දැනුම්වත් කිරීමේ අවශ්‍යතාව කෘෂිකර්ම දෙපාර්තමේන්තුවේ නිලධාරීන් වෙත දැනුම් දී ඇති අතර ඒ අනුව සෑම ප්‍රදේශයකම ගොවීන් දැනුම්වත් කිරීමට සැලසුම් සකස් කරන බව කමිටු සභාපතිවරයා පැවැසීය. කාබනික පොහොර යොදා ගනිමින් ගොවිතැන් කරන ආදර්ශ කෘෂිකාර්මික ගොවිපොළ වෙත සෘජුවම ගොස් එහි තත්ත්වයන් සොයා බැලීමට යොමුවන බව ද ඔහු ප්‍රකාශ කළේය. එමෙන්ම කාබනික පොහොර නිෂ්පාදනය කරන ව්‍යවසායකයන් දිරිගැන්වීමේ අවශ්‍යතාව පෙන්වා දුන් කමිටු සභාපතිවරයා පොහොර භාවිතය සම්බන්ධයෙන් ස්ථිර ජාතික ප්‍රතිපත්තියක් ක්‍රියාත්මක කළහොත් සාධනීය වෙනසක් ඇති කළ හැකි බව ද පෙන්වා දුන්නේය.
පාර්ලිමේන්තු මන්ත්‍රි කපිල අතුකෝරල, සුදත් මංජුල මහත්වරුන් සහ රාජ්‍ය නිලධාරීහු පිරිසක් මේ අවස්ථාවට සහභාගි වූහ.
