රිජ්වේ ආර්යා ළමා රෝහලේ හෘද උරස් ශල්‍යාගාරය වෙත විවෘත හදවත් සැත්කම් සඳහා භාවිතා කරන Heart Lung Machines දෙකක් ලබාදීම පෙරේදා (29) සිදු කෙරිණි.
සෞඛ්‍ය හා කර්මාන්ත ඇමැති වෛද්‍ය රමේෂ් පතිරණ මහතාගේ උපදෙස් පරිදි මෙරට රෝහල් පද්ධතියට අත්‍යවශ්‍ය වෛද්‍ය උපකරණ කඩිනම්න් ලබාගනිමින් රෝගී ප්‍රතිකාර සේවාවන් ශක්තිමත් කිරීම සඳහා සෞඛ්‍ය අමාත්‍යාංශය ගෙනයන වැඩපිළිවෙළ යටතේ ජනාධිපතිවරයාගේ සෘජු මැදිහත් වීම යටතේ මෙම වෛද්‍ය උපකරණ ලබාගැනීමට හැකියාව ලැබී ඇත.
සෞඛ්‍ය ලේකම් විශේෂඥ වෛද්‍ය පාලිත මහීපාල මහතාගේ ප්‍රධානත්වයෙන් එම උපකරණ ලබාදීම සිදු වූ අතර එම එක් යන්ත්‍රයක වටිනාකම රුපියල් මිලියන 80කි.
රිජ්වේ ආර්යා ළමා රෝහලේ විවෘත හදවත් සැත්කම් සඳහා භාවිත කරන යන්ත්‍ර වසර 15කට වඩා පැරණි වන අතර, එම යන්ත්‍ර තවදුරටත් භාවිතා කිරීමට සුදුසු තත්ත්වයක නොපැවතීම නිසා මෙම යන්ත්‍ර ලබාදීම සිදුකෙරිණි.
විවෘත හදවත් සැත්කම් සදහා වන පොරොත්තු ලේඛනයේ දැනට කුඩා රෝගී දරුවන් 3,000ක් පමණ සිටින අතර මෙම යන්ත්‍ර මගින් විශාල සේවයක් ලබා ගත හැකිය.
