ශ්‍රී ලංකාවේ වෙළෙඳපොළ පදනම් කර ගත් සුහුරු කිරි නිෂ්පාදන ව්‍යාපෘතියක් ආරම්භ කිරීම පෙරේදා (29) කෘෂිකර්ම හා වැවිලි කර්මාන්ත ඇමැති මහින්ද අමරවීර මහතාගේ සහ ශ්‍රී ලංකාවේ අමෙරිකා එක්සත් ජනපදයේ තානාපතිනි ජූලි චංග් මහත්මියගේ ප්‍රධානත්වයෙන් කොළඹ Move Npick හෝටලයේ දී පැවැත්විණි.
අමෙරිකා එක්සත් ජනපදයේ සංවර්ධනය සඳහා වන කෘෂිකර්ම දෙපාර්තමේන්තුවේ මුල්‍ය අනුග්‍රහය මත ශ්‍රී ලංකාව තුළ සුළු හා මධ්‍යම පරිමාණ කිරි නිෂ්පාදකයින් බලගැන්වීම සඳහා මෙම වෙළෙඳපොළ පදනම් කර ගත් සුහුරු කිරි නිෂ්පාදන ව්‍යාපෘතිය ක්‍රියාත්මක කර ඇත.
මෙම වැඩපිළිවෙළ යටතේ අප රටේ කුඩා හා මධ්‍යම මට්ටමේ කිරි නිෂ්පාදන කටයුතුවල නිරතවන කිරි ගොවීන් 15,000කට ව්‍යාපාරික කිරි කර්මාන්තය සඳහා අවශ්‍ය පහසුකම් සැපයීමට නියමිතය. එමෙන්ම කිරි නිෂ්පාදනවල ගුණාත්මකභාවය පිළිබඳ කරුණු 27ක් යටතේ කිරි ගොවීන් 27 දෙනෙක් මූලිකව පුහුණු කිරීමට පියවර ගෙන ඇති අතර ඔවුන් මඟින් අනෙකුත් කිරි ගොවීන් පුහුණු කිරීමට පියවර ගෙන තිබේ.
මෙහිදී අදහස් පළ කළ ශ්‍රී ලංකාවේ අමෙරිකා එක්සත් ජනපද තානාපතිනි ජූලි චංග් මහත්මිය මෙම දේශගුණ සුහුරු කිරි නිෂ්පාදන ව්‍යාපෘතිය එක්සත් ජනපද අරමුදල් යටතේ ශ්‍රී ලංකාවේ ක්‍රියාත්මක කරනු ලබන නවතම ව්‍යාපෘතිය බවත්, ශ්‍රී ලංකාවේ කිරි ගොවීන් සඳහා තරගකාරිත්වය හා හොඳ නිෂ්පාදන පුරුදු යටතේ තම නිෂ්පාදන අලෙවි කර ගැනීම සඳහා වෙළෙඳපොළ මූලික කර ගත් කිරි නිෂ්පාදන කර්මාන්ත වැඩපිළිවෙළ විශාල සහයෝගයක් වනු ඇති බවත් ප්‍රකාශ කළාය.
කෘෂිකර්ම හා වැවිලි කර්මාන්ත අමාත්‍ය මහින්ද අමරවීර මහතා මෙහිදී පැවැසුවේ මෙම ව්‍යාපෘතිය ආරම්භ කිරීම සම්බන්ධව අමෙකාව එක්සත් ජනපද රජයට ස්තුතිය පළ කරන බවයි. විශේෂයෙන් ශ්‍රී ලංකාවේ කිරි නිෂ්පාදන කර්මාන්තය පසුගිය කාලය තුළ පැවැති ආර්ථික අර්බුදය මෙන්ම රසායනික පොහොර අර්බුදය නිසා පහත වැටුණු බවත්, වර්තමානයේ නැවතත් කිරි නිෂ්පාදන කර්මාන්තය ඉහළ නැංවීම සඳහා ආණ්ඩුව සාධනීය ව්‍යාපෘති රැසක් ආරම්භ කර ඇති බවත් ඇමැතිවරයා ප්‍රකාශ කළේය.මෙම සුහුරු කිරි නිෂ්පාදන ව්‍යාපෘතිය සඳහා සම්පූර්ණ සහයෝගය ලබා දීමට කටයුතු කළ ශ්‍රී ලංකාවේ අමෙරිකා එක්සත් ජනපද තානාපතිනි ජූලි චංග් මහත්මියට ද ආණ්ඩුව වෙනුවෙන් මෙන්ම මෙරට කිරි ගොවීන් වෙනුවෙන් තම කෘතඥතාව පළ කරන බව ද ඇමැතිවරයා කීය.
