මෙවර මහ කන්නයේ වැඩිම වී අස්වැන්න උඩවලව කලාපයට අයත් කුඹුරුවලින් වාර්තා වී ඇතැයි කෘෂිකර්ම අමාත්‍යාංශ වාර්තා සඳහන් කරයි.
ඇතැම් කුඹුරුවල හෙක්ටයාර් එකකට වී අස්වැන්න මෙට්‍රික් ටොන් 12 ඉක්මවා ඇති බවත් මෙවර මහ කන්නයේ වී වගාව මඟින් ලැබිය හැකි අස්වැන්න වී මෙට්‍රික් ටොන් ලක්ෂ 36 ඉක්මවනු ඇති බවත් කෘෂිකර්ම හා වැවිලි කර්මාන්ත ඇමැතිවරයාගේ ප්‍රධානත්වයෙන් එම අමාත්‍යාංශයේදී පැවැති භෝගනායකවරුන්ගේ රැස්වීමේදී අනාවරණය වී තිබේ. දැනට සිදු කර ඇති අස්වනු පුරෝකථන පරීක්ෂණ අනුව මේ කරුණු හෙළි වී ඇත.
පසුගිය යල කන්නයේ පැවති දීර්ඝ නියඟය හේතුවෙන් වැඩිම වගා හානි වාර්තා වූ උඩවලව කලාපයේ කුඹුරුවලින් මෙවර වැඩිම වී අස්වැන්න වාර්තා වී තිබීම විශේෂ සිදුවීමකි. මෙවර මහ කන්නයේ එකදිගට මාස හතරහමාරක පමණ කාලයක් පැවති මහ වැස්ස හේතුවෙන් අක්කර 100,000ක වී වගාව විනාශ වී තිබු තත්ත්වයක මෙවැනි අස්වැන්නක් ලැබීම සම්බන්ධයෙන් රටේ ගොවිජනතාවට සමස්ත ජනතාවගේ කෘතඥතාව පළ විය යුතු බව ඇමැති අමරවීර මහතා මේ රැස්වීමේදී අවධාරණය කළේය. එමෙන්ම වැඩිම අස්වනු පසුහානියද මෙවර වාර්තා වී තිබේ. විශේෂයෙන් අස්වනු නෙළීමේ ප්‍රමාදය නිසා සමස්ත වී අස්වැන්නෙන් 10% සිට 15% දක්වා ප්‍රමාණයක් පසු අස්වනු නාස්තියට ලක් වී ඇත. ඇතැම් ප්‍රදේශවල පසු අස්වනු නාස්තිය 25% දක්වා ඉහළ මට්ටමක පවතී. මේ පසු අස්වනු නාස්තිය හේතුවෙන් අවම වශයෙන් වී මෙට්‍රික් ටොන් ලක්ෂ 3ක පමණ නාස්තියක් සිදු වී තිබෙන බව කෘෂිකාර්මික අංශ අවධාරණය කර ඇතැයිද ඇමැතිවරයා මෙහිදී පැවසීය.
