ශ්‍රී ලංකා නාවික හමුදාව සහ පොලිස් විශේෂ කාර්ය බළකාය එක්ව සිදු කළ මෙහෙයුමකදී මන්නාරම ඉලුප්පකඩවෙයි වැවේ ලඳු කැලෑවක සඟවා තිබූ මත්පෙති 53,000ක් පෙරෙදා (29) සොයා ගෙන තිබේ.
මෙම මත්පෙතිවල වටිනාකම රුපියල් ලක්ෂ හතළිහක් පමණ වන බවට ගණන් බලා ඇති අතර එම මත්පෙති ඉන්දියාවෙන් මන්නාරමට රැගෙන එන්නට ඇති බවට විශ්වාස කරයි.
සෝදිසි මෙහෙයුමක නිරත වූ නිලධාරීන් ලඳු කැලෑවේ සඟවා තිබූ සැකකටයුතු පෙට්ටියක් සොයා ගෙන ඇති අතර එම පෙට්ටිය තුළ මෙම මත්පෙති බහා තිබියදී නිලධාරීන් විසින් ඒවා අත්අඩංගුවට ගෙන තිබේ.
නිලධාරීන් පවසන්නේ සැකකරුවන් මෙම මත්පෙති වෙනත් පළාතකට ප්‍රවාහනය කිරීමේ අරමුණින් ඒවා ලදු කැලෑවේ සඟවා තබන්නට ඇති බවයි.
මත්පෙතිවල අයිතිකරු සෙවීම පිණිසත් මේ සම්බන්ධයෙන් වැඩිදුර පරීක්ෂණ සිදු කිරීමටත් අත්අඩංගුවට ගත් මත්පෙති තොගය නාවික හමුදාව හා පොලිස් විශේෂ කාර්ය බළකායේ නිලධාරීන් විසින් ඉලුප්පකඩවෙයි පොලිසියට භාර දී තිබේ.
