නවසීලන්ත ක්‍රිකට් කණ්ඩායම සමඟ පැවැත්වෙන පළමු ටෙස්ට් තරගයේ දෙවැනි දිනය නිමා වන විට ලකුණු 217කින් පෙරමුණ ගැනීමට සංචාරක ඔස්ට්‍රේලියානු පිල සමත්ව සිටී.
වෙලිංටන්හිදී පැවැත්වෙන තරගය දෙවැනි දිනයට නතර කරන විට ඔස්ට්‍රේලියාව දෙවැනි ඉනිම වෙනුවෙන් කඩුලු 2ක් දැවී ලකුණු 13ක් රැස් කර තිබූ අතර, ඔවුනට පළමු ඉනිමේදී ලකුණු 204ක වාසියක් අත්ව තිබිණි.
තරගයේ පළමුව පන්දුවට පහරදුන් ඔස්ට්‍රේලියාව පළමු ඉනිමට ලකුණු 383ක් රැස් කළ අතර, පිළිතුරු ලෙස නවසීලන්තයට පළමු ඉනිම වෙනුවෙන් රැස් කළ හැකි වූයේ ලකුණු 179ක් පමණි.
ඊයේ දිවා විවේකයෙන් පසු පන්දුවට පහර දීමට පිටියට පිවිසි නවසීලන්ත පිලේ මුල් පෙළ පිතිකරුවන් 5 දෙනකු සවස තේ පානයටත් පෙර යළි ක්‍රීඩාගාරයට හරවා යැවීමට ඔස්ට්‍රේලියානු පන්දු යවන්නෝ සමත් වූහ.
ලකුණු 29ක් වෙද්දී නවසීලන්ත ඉනිමේ 5 වැනි කඩුල්ල බිඳ වැටුණු අතර, 6 වැනි කඩුල්ලට ලකුණු 84ක් එක් කිරීමට ඉනිමේ වැඩිම ලකුණුලාභියා වූ ග්ලේන් පිලිප්ස් සහ ටොම් බ්ලන්ඩල් සමත් වූහ. පිලිප්ස් ලකුණු 71ක් රැස් කළ අතර, ටොම් ලකුණු 33කට දැවී ගියේය. පන්දු යැවීමේදී නෙදන් ලයන් කඩුලු 4ක් සහ ජොෂ් හේස්ල්වුඩ් කඩුලු 2ක් දවා ගත්හ.
පළමු දිනය නිමා වන විට කඩුලු 9ක් දැවී ලකුණු 279ක් රැස් කර සිටි ඔස්ට්‍රේලියානු ඉනිම ලකුණු 383 දක්වා ඉදිරියට ගෙන යෑමට කැමරන් ග්‍රීන් සමත් විය.
පළමු දිනයේ නොදැවී ලකුණු 103ක් රැස් කර සිටි ග්‍රීන් ඊයේ සිය හොඳම ටෙස්ට් ඉනිම වාර්තා කළේ නොදැවී ලකුණු 174ක් රැස් කරමිනි. පන්දු 275කදී හතරේ පහර 23කින් සහ හයේ පහර 5කින් ඉනිම වර්ණවත් කරගත් ග්‍රීන් අවසන් කඩුල්ලට ජොෂ් හේස්ල්වුඩ් (22) සමඟ එක්ව ලකුණු 116ක සබඳතාවක් ගොඩනැඟීමට සමත් විය.
අද තරගයේ තෙවැනි දිනයයි.
