ද්‍රවිඩ ජාතික සන්ධානයේ පාර්ලිමේන්තු මන්ත්‍රී එම්.ඒ. සුමන්දිරන් මහතා ඝාතනයට කිරීමට උත්සාහ කිරීම හා තහනම් සංවිධානයක් වන එල්ටීටීඊය ප්‍රවර්ධනය ඇතුළු අධි චෝදනා 8ක් යටතේ හිටපු එල්ටීටීඊ ක්‍රියාකාරීන් සිව් දෙනකුට එරෙහිව පවරා ඇති නඩුවේ ප්‍රධාන විත්තිකරු වන මහත්මාජී අනෝජන් යන අයට කොළඹ මහාධිකරණ පෙරේදා (07දා) වරෙන්තු නිකුත් කළේය.
කොළඹ මහාධිකරණ විනිසුරු මංජුල තිලකරත්න මහතා හමුවේ නඩුව කැඳවූ අවස්ථාවේ පැමිණිල්ල කළ කරුණු දැක්වීමට අනුව දිගින් දිගටම අධිකරණය මඟහැර සිටින සිව්වැනි චූදිත අත්අඩංගුවට ගෙන වහා අධිකරණයට ඉදිරිපත් කරන ලෙස විනිසුරුවරයා නියෝග කළේය.
ත්‍රස්ත විමර්ශන කොට්ඨාසයට මන්ත්‍රීවරයා කළ පැමිණිල්ලකට අනුව නීතිපතිවරයා විසින් කරාලසිංහම් කුලේන්ද්‍රන් නොහොත් සෝලෙයි කුමරන් නොහොත් මාස්ටර්, ලිවිස් මරියනායගම් අජන්තන් නොහොත් කඩලන් නොහොත් ජනා, මුරුගයියා තවවේන්ද්‍රන් නොහොත් වේන්දන්, ඥානසේකරලිංගම් රාස්මදන් නොහොත් මදන් නොහොත් වරදන්, මහත්මාජී අනෝජන් නොහොත් කන්නන් නොහොත් වෙට්ට්‍රි යන තැනැත්තන්ට විරුද්ධව නඩු පවරා තිබේ.
නඩුව විභාගයට ගත් අවස්ථාවේ එම්.ඒ. සුමන්දිරන් මන්ත්‍රීවරයා පැමිණිල්ල වෙනුවෙන් සාක්ෂි දීමට සූදානම්ව පැමිණ සිටියද සිව්වැනි විත්තිකරු පෙනී නොසිටීම නිසා සාක්ෂි විභාගය සිදු නොවීය.
2016 වසරේ ඔක්තෝබර් මස 2017 වසරේ ජනවාරි අතර කාලය තුළදී චුදිතයන් නම නොදත් තවත් තැනැත්තන් සමඟ එක්ව කිලිනොච්චියේ තිරුවෙයියාරු, කනකපුරම්, මනමුනේ යන ස්ථානවලදී හිදී ක්ලේමෝ බෝම්බ, බෝම්බ සහ ඩෙටනේටර 200කට වැඩි ප්‍රමාණයක් සන්තකයේ තබා ගැනීම හා එම්.ඒ. සුමන්දිරන් මන්ත්‍රීවරයා ඝාතනය කිරීමට උත්සාහ කිරීම හා තහනම් ත්‍රස්ත සංවිධානයක් වන කිරීමේ වරදට නඩු පවරා තිබේ.
දණ්ඩ නීති සංග්‍රහයේ 32 වන වගන්තිය සහ ආණ්ඩුක්‍රම ව්‍යවස්ථාවේ 44(2)වගන්තිය සමඟ කියවිය යුතු 1982 අංක 10 සහ 1988 අංක 22 දරන පනත්වලින් සංශෝධිත 1979 අංක 48 දරණ ත්‍රස්තවාදය වැලැක්වීමේ (තාවකාලික) පනතේ 2 හා 27 වැනි වගන්තිය යටතේ ජනාධිපතිවරයා විසින් ප්‍රකාශයට පත් කරන ලද 2011 අගෝස්තු 29 දා නිකුත් කළ 171/2 ගැසට් පත්‍රයට අනුව තහනම් සංවිධානයක් වන එල්ටීටීඊය ප්‍රවර්ධනය, ඒ වෙනුවෙන් වැඩ කිරීම හා එම වරද සිදු කිරීමට අන් අය පෙලඹවීම, අනුබල දීම, පොදු අරමුණක් ඇතිව වැඩ කිරීමට එකඟ වීමෙන් ඉහත නියෝලය උල්ලංඝනය කිරීමේ වරදට සහ ශ්‍රී ලංකා ජනරජයේ පාර්ලිමේන්තු මන්ත්‍රීවරයකුගේ මරණය සිදු කිරීම හෝ එය සිදු කිරීමට අනුබල දීම සහ ඇතුළු අධි චෝදනා 8ක් යටතේ නීතිපතිවරයා විසින් විත්තිකරුවන්ට එරෙහිව චෝදනා ගොනු කර තිබේ. 1 හා 2 විත්තිකරුවන් වෙනුවෙන් නීතිඥ කේ.එස්. රත්නවේල්, නීතිඥ රතින්ද්‍ර කරුණාරත්න සහ 3, 4 විත්තිකරුවන් වෙනුවෙන් නීතිඥ සුරංග බණ්ඩාරයන මහත්වරු පෙනී සිටියහ.
