පැතුම් නිශ්ශංක සහ චරිත් අසලංක ගොඩනැඟූ වාර්තාගත සබඳතාව හේතුවෙන් බංග්ලාදේශයට එරෙහිව ඊයේ චැටෝග්‍රෑම්හිදී පැවති දෙවැනි දිවා රාත්‍රි එක්දින තරගය කඩුලු 3කින් ජය ගැනීමට ශ්‍රී ලංකා කණ්ඩායම සමත් විය.
මේ සමඟ තරග 3කින් සමන්විත එක්දින තරගාවලිය 1-1 ලෙස සමකර ගැනීමට ද ශ්‍රී ලංකා පිලට හැකි විය.
තරගයේ පළමුව පන්දුවට පහර දෙමින් බංග්ලදේශය දුන් ලකුණු 287ක ඉලක්කය හඹා ගිය ශ්‍රී ලංකා ක්‍රීඩකයෝ පන්දු 17ක් ඉතිරිව තිබියදී ජයග්‍රාහී ඉලක්කය පසු කළේ කඩුලු 7ක් පමණක් අහිමි කර ගනිමිනි.
මුල් කඩුලු 3 (අවිශ්ක 0, මෙන්ඩිස් 16 හා සදීර 1) ලකුණු 43ක් තුළ බිඳ වැටීමෙන් අනතුරුව ආරම්භක පිතිකරු පැතුම් නිශ්ශංකට එක් වූ චරිත් අසලංක ලකුණු 185ක සබඳතාවක් සමඟින් ශ්‍රී ලංකා පිල ජයග්‍රාහී මාවතට රැගෙන ගියේය.
පන්දු 183කින් ගොඩනැඟුණු මේ සබඳතාව වාර්තා අතරට එක් වූයේ එක්දින තරගයකදී ශ්‍රී ලංකා පිල වෙනුවෙන් සිව්වැනි කඩුල්ලට ගොඩනැඟූ ඉහළම සබඳතාව ලෙසිනි. ඊයේ බිඳ වැටුණේ 1997දී අර්ජුන රණතුංග සහ රොෂාන් මහානාම විසින් බටහිර ඉන්දීය කොදෙව්වන්ට එරෙහිව ලකුණු 171කින් පිහිටුවා තිබූ වාර්තාවයි.
මුළු ලකුණු 228දී ලකුණු 114ක් රැස් කර සිටි පැතුම් දැවී යෑමෙන් එම සබඳතාව නිමා විය. ඊයේ 6 වැනි එක්දින ශතකය රැස් කළ පැතුම් පන්දු 113කට මුහුණ දෙමින් හතරේ පහර 13ක් සහ හයේ පහර 3ක් එල්ල කර තිබිණි.
තවත් ලකුණු 7ක් එක් වෙද්දී අසලංකගේ ඉනිම ලකුණු 91කට සීමා වූ අතර, ඔහුගේ 12 වැනි එක්දින අර්ධ ශතකය වූ ඒ සඳහා පන්දු 93කදී හතරේ පහර 6ක් සහ හයේ පහර 4ක් ඇතුළත් විය. 6 වැනි කඩුල්ල ලෙස ජනිත් ලියනගේ ලකුණු 9කට දැවී යෑමෙන් පසු වනිඳු හසරංග සහ දුනිත් වෙල්ලාලගේ එක්ව කණ්ඩායම ජයග්‍රහණය කරා ගෙන ගියහ. වනඳු පන්දු16කින් ලකුණු 25ක් රැස් කළ අතර, දුනිත් නොදැවී ලකුණු 15ක් රැස් කළේය. මේ තරගයේදීත් කාසියේ වාසිය සතු වුවද මෙවර පළමුව පන්දු යැවීමට ශ්‍රී ලංකා පිල තීරණය කළේය. ඒ අනුව සෞම්‍ය සර්කාර් සමඟින් පිටියට පිවිසි ලිටොන් දාස්ට මේ තරගයේදීත් ලකුණු රැස් කිරීමට අවස්ථාවක් නොදුන් ඩිල්ෂාන් මධුෂංක තෙවැනි පන්දුවෙන්ම ඔහු යළි ක්‍රීඩාගාරයට හරවා යැවුවේය.
එහෙත් සර්කාර් නායක නජ්මුල් හොසේන් සමඟ එක්ව දෙවැනි කඩුල්ලට ලකුණු 75ක සබඳතාවක් පිහිටවූ අතර, පළමු තරගයේදී විශිෂ්ට ශතකයක් රැස් කළ නජ්මුල්ගේ ඉනිම ලකුණු 40කට සීමා කිරීමට මධුෂංකට හැකි විය. මුළු ලකුණු 130ක් වෙද්දී 22 වැනි ඕවරයේ 2 වැනි පන්දුවෙන් සර්කාර් (68) දවාගත් වනිඳු හසරංග මහමුදුල්ලාහ් මුහුණ දුන් දෙවැනි පන්දුවෙන්ම යළි ක්‍රීඩාගාරයට හරවා යැවීමට ද සමත් විය. පළමු තරගයේදී ඔහු වනිඳුට එරෙහිව හයේ පහරක් එලල් කළ අතර, එය බංග්ලාදේශ පුහුණුකරු චන්දික හතුරුසිංහගේ විශේෂ ඇගයීමකට ද ලක් විය. මහමුදුල්ලාහ් ඊයෙත් එවැනි පහරක් එල්ල කිරීමට ගොස් කඩුලු රකින කුසල් මෙන්ඩිස් විසින් ස්ටම්ප් කිරීමට හසුකර ගත්තේය.
කෙසේ වෙතත් ඉනිම ගොඩනැඟීමේ කාර්යය කරට ගත් තව්හිඩ් හිඩෝයි ඉනිම නිමා වන තෙක් කඩුල්ලේ රැඳී සිටිමින් මුළු ලකුණු සංඛ්‍යාව 286 දක්වා ඉදිරියට ගෙන ගියේය. සර්කාර් සමඟින් ලකුණු 55ක් එක්කළ හිඩෝයි විශිෂ්ටම සබඳතාව ගොඩනැඟූවේ ටස්කින් අහමඩ් සමඟින් 8 වැනි කඩුල්ලටය. ඉන් පෙර මුෂ්ෆිකර් රහීම් සමඟ ලකුණු 43ක්, ටැන්සිම් හසන් සමඟ ලකුණු 47ක් එක් කිරීමට ඔහුට හැකි විය. රහීම් ඊයේ ලකුණු 25කට වනිඳුගේ තෙවැනි කඩුල්ල ලෙස දැවී ගිය අතර, ටැන්සින් ලකුණු 18ක් රැස් කළේය.
අවසන් ඕවර 4දී 8 වැනි කඩුල්ලට ලකුණු 50ක් එක්කිරීමට හිඩෝයි සහ ටස්කින් සමත් වූහ. ටස්කින් ලකුණු 18ක් පමණක් රැස් කළ අතර, එහිදී හිඩ්‍රෝයි ලකුණු 31ක් රැස් කළේ පන්දු 13කිනි. ඔහු ඉනිම නිමා වන විට සිය හොඳම එක්දින ඉනිම ලෙස නොදැවී ලකුණු 96ක් රැස් කර තිබුණේ පන්දු 103කදී හතරේ පහර 3ක් සහ හයේ පහර 5ක් සමඟිනි.
බංග්ලාදේශ ඉනිමේ 27 වැනි ඕවරයේ පන්දු 4ක් යැවීමෙන් පසු පාදයේ ආබාධයක් හේතුවෙන් ඩිල්ෂාන් මධුෂංක (ඕවර 6.4) පිටියෙන් ඉවත් විය. එහි අවසන් පන්දු දෙක යැවීමට ජනිත් ලියනගේ කටයුතු කළේය.
මේ තරගයේදීමහීෂ් තීක්ෂණ වෙනුවට ශ්‍රී ලංකා කණ්ඩායමට දුනිත් වෙල්ලාලගේ කැඳවා තිබූ අතර, බංග්ලාදේශ කණ්ඩායම පළමු තරගයට ක්‍රීඩා කළ කණ්ඩායමම එක් කර තිබිණි.
දෙපිල අතර අවසන් එක්දින තරගය සඳුදා මෙරට වේලාවෙන් පෙරවරු 9.30ට චැටෝග්‍රෑම්හිදීම පැවැත්වේ.
