තියුණු ආයුධයකින් පහරදී සිය බිරියගේ නැඟණිය ඝාතනය කරන ලදැයි කරන්දෙණිය පොලිසිය මඟින් අත්අඩංගුවට ගන්නා සැකකරුවන් දෙදෙනකු 2024 මාර්තු මස 21 වැනි දින දක්වා රක්ෂිත බන්ධනාගාරගත කිරීමට ඇල්පිටිය මහේස්ත්‍රාත් මධුෂිකා වාසලමුදලි මහත්මිය පසුගියදා (15) නියෝග කළාය.
සිද්ධිය සම්බන්ධයෙන් තවදුරටත් විමර්ශන කර ප්‍රගතිය වැඩිදුර වාර්තාවක් මඟින් උසාවියට ඉදිරිපත් කරන ලෙසත් ඝාතනයට අනුබල දීම මත හඳුනාගෙන තිබෙන අනෙක් සැකකරු ද අත්අඩංගුවට ගෙන අධිකරණයට ඉදිරිපත් කරන ලෙසත් මහේස්ත්‍රාත්වරයා කරන්දෙණිය පොලිසියට උපදෙස් දුන්නේය. මෙසේ රක්ෂිත බන්ධනාගාරගත කරන ලද්දේ කන්ද කඩේ පාර, මණ්ඩකන්ද, කරන්දෙණිය ලිපිනයේ පදිංචි ඩබ්ලිව්. සුදේශ් ප්‍රියදර්ශන (37) නමැති අය සහ තරුණිය පැහැරගෙන යෑමට යොදා ගත් ත්‍රිරෝද රථයේ රියැදුරුය.
මෙලෙස ඝාතනය කර ඇත්තේ කරන්දෙණිය පොලිස් වසමේ මණ්ඩකන්ද, තල්ගහවත්ත ප්‍රදේශයේ පදිංචිව සිටි හංසිකා නදීෂානි නමැති 17 හැවිරිදි තරුණියකි. තියුණු ආයුධයකින් කළ මාරාන්තික කැපුම් තුවාල සහිතව මෙම තරුණියගේ මල සිරුර ඇල්පිටිය, කුරුඳුගහහැතැප්ම, නානායක්කාර මාවතේ තේ ඉඩමක තිබියදී පසුගිය මාර්තු 09 වැනි දින දහවල් ඇල්පිටිය පොලිසිය මඟින් සොයාගෙන තිබිණි.
මෙම තරුණිය හා සැකකරුගේ බිරිය වන ඇගේ සහෝදරිය මීට ටික කාලයක සිට යම් යම් ආරවුල් සම්බන්ධයෙන් කරන්දෙණිය පොලිසියට පැමිණිලි කර තිබෙන බව ද කරන්දෙණිය පොලිසිය කියයි. මීට අදාළව පැමිණිල්ලක් විභාග කිරීමට කරන්දෙණිය පොලිසියට පැමිණෙමින් සිටියදී ඝාතනයට ලක් වූ තරුණිය සැකකරු විසින් ත්‍රිරෝද රථයකින් පැමිණ පැහැරගෙන ගොස් තිබෙන බවට ද පොලිස් පරීක්ෂණවලදී තහවුරු වී තිබේ.
කරන්දෙණිය පොලිසිය හා ඇල්පිටිය පොලිසිය වැඩිදුර පරීක්ෂණ පවත්වන අතර කරන්දෙණිය පොලිසියේ කාන්තා පොලිස් කොස්තාපල් අනෝමා සඳමාලි (9201) සැකකරුවන් අධිකරණයට ඉදිරිපත් කරමින් නඩු කටයුතු මෙහෙයවීය.
