මෙම අවුරුද්ද ඉතාම තීරණාත්මක අවුරුද්දක් බවත් නව ආණ්ඩුවක් හදන, නව පාලනයක් ගෙනෙන අවුරුද්දක් බවට මේ අවුරුද්ද පත් කරගත හැකි බවත් ජාතික ජන බලවේගයේ නායක අනුර කුමාර දිසානායක මහතා පැවසීය.
ඔහු එසේ ප්‍රකාශ කළේ, ජාතික ජන බලවේගයේ වවුනියාව දිස්ත්‍රික් සමුළුව අමතමිනි. මෙය පෙරේදා (16) පැවැත්විණි.
එහිදී වැඩිදුරටත් අදහස් දැක්වූ ජාතික ජන බලවේගයේ නායක අනුර කුමාර දිසානායක මහතා,
වවුනියාව වැදගත් දිස්ත්‍රික්කයක්. සිංහල, දෙමළ, මුස්ලිම් ජනතාව ඉතා සමගියෙන් ජීවත් වන දිස්ත්‍රික්කයක්. දීර්ඝ කාලයක් මේ රටේ පාලකයන් මේ රට පාලනය කළා. රටේ ජනතාවත් විශාල බලාපොරොත්තු තබාගෙන ආණ්ඩු හැදුවා. ආණ්ඩු පෙරළුවා. නායකයො ගෙනාවා. නායකයො මාරු කළා. රටටත් ජනතාවටත් සිදුවෙලා තියෙන්නෙ මොකක්ද? ඔවුන් ජනතාවගේ ප්‍රශ්න විසඳන්න සමත් වෙලා තියෙනවාද?
නිදහසෙන් පස්සෙ හැමදාම සිංහල, දෙමළ ජනතාව තරහා වෙනවා. සිංහල – මුස්ලිම් ජනතාව තරහා වෙනවා. එකිනෙකා අතර ගැටුම් ඇති කරවනවා. දියුණු වෙන කිසිදු රටක් ජාතිවාදී ගැටුම් මධ්‍යයේ දියුණු වෙනවාද? ඉන්දියාවේ විවිධ ආගම්, විවිධ භාෂාවන්, විවිධ සංස්කෘතීන් තිබියදී අබ්දුල් කලාම් ජනාධිපති වෙනවා. සික් ජාතිකයකු අගමැති ධුරයට පත් වෙනවා. අද කුලහීන යැයි සම්මත කාන්තාවක ජනාධිපති වෙලා තිබෙනවා. අදත් මේ වේදිකාවෙ සිංහල, දෙමළ අය එකට වාඩිවෙලා ඉන්නවා. මම සිංහලෙන් කතා කරනවා. කෝකිලන් ඒක පරිවර්තනය කරනවා.
