ශ්‍රී ලංකා පිල සමඟ ඊයේ චිතගොං නුවර පැවැති තුන්වැනි හා අවසන් එක්දින තරගයෙන් කඩුලු 4ක ජයක් වාර්තා කළ බංග්ලාදේශ පිල තරග 3කින් සමන්විත එක්දින තරගාවලිය 2-1කින් ජය ගැනීමට සමත් විය. දෙපිල අතර වසර 22ක එක්දින තරගාවලි ඉතිහාසයේ ශ්‍රී ලංකා පිල බංග්ලාදේශය හමුවේ තරගාවලියක් පරාජයට පත් වූ දෙවැනි අවස්ථාව ලෙසත්, මේ වසරේදී ශ්‍රී ලංකා පිල පරාජය වූ පළමු එක්දින තරගාවලිය ලෙසත් එය වාර්තා වේ. මීට පෙර 2021 වසරේ ශ්‍රී ලංකා පිලේ බංග්ලාදේශ සංචාරය අතරතුර පැවැති එක්දින තරගාවලියෙන් බංග්ලාදේශ පිල තරග 2-1කින් ජයගත්තේය.
තීරණාත්මක තරගයට අවශ්‍ය ආකාරයේ පිතිහරඹයක නිරත නොවූ ශ්‍රී ලංකා පිල පළමුව පන්දුවට පහර දී ඕවර 50 අවසානයේ සියලුදෙනා දැවී රැස් කළ ලකුණු 235 හඹා ගිය බංග්ලාදේශ පිතිකරුවන් තරගය ජයගත්තේ ඕවර 40කුත්, පන්දු 2කදී කඩුලු 6ක් වැය කරමිනි. ශ්‍රී ලංකා ඉනිමේ මුල්පෙළ පිතිකරුවන් අසාර්ථක වෙද්දී අංක 6 ස්ථානයෙන් පිටියට පැමිණි ජනිත් ලියනගේ හුදෙකලා සටනක නිරත වෙමින් ශ්‍රී ලංකා ඉනිම ලකුණු 200 සීමාවෙන් ඔබ්බට රැගෙන ගිය අතර, සිය මංගල එක්දින ශතකය වාර්තා කිරිමට ද සමත් විය. මේ වසරේ ජනවාරියේදි සිම්බාබ්වේ පිලට එරෙහිව එක්දින තරග වරම් ලැබූ 28 හැවිරිදි ජනිත් ලියනගේ පන්දු 102කදී හතරේ පහර 11ක් සහ හයේ පහර 2ක් සමඟ නොදැවී රැස් කළ ලකුණු සංඛ්‍යාව 101කි.
ලකුණු 236ක ඉලක්ක හඹා ගිය බංග්ලාදේශ පිලේ මුල් පෙළ පිතිකරුවන් දැඩි පීඩනයකට ඇද දැමූ ළහිරු පෙරේරා කඩුලු 4ක් දවාලමින් ප්‍රතිවාදී පිතිකරුවන් මෙල්ල කිරීමට සමත් වූවද, ලකුණු 84ක් රැස් කළ ආරම්භක පිතිකරු ටන්සිඩ් හසන් සහ මැදපෙළින් පිටියට පැමිණි ජ්‍යෙෂ්ඨ පිතිකරු මුෂ්ෆිකුර් රහීම් බංග්ලාදේශ ජයග්‍රහණයට අඩිතාලම දැමීමට සමත් වූහ. එහෙත් බංග්ලාදේශ ක්‍රීඩකයන්ගේ පන්දු යැවීමත්, පිතිහරඹයත් තරගය පුරා කැපී පෙනුණු අතර, ශ්‍රී ලංකා පිලේ ලකුණු 235 ආවරණය කරගැනීමට පන්දු යවන්නන් ගත් උත්සාහය මුළුමනින්ම අසාර්ථක වූයේ 37 වැනි ඕවරයේදී පිටියට පිවිසි 21 හැවිරිදි රිෂාඩ් හොසේන් පිටියට පිවිසීමත් සමඟය. ඒ වන විට බංග්ලාදේශ පිල කඩුලු 5ක් අතැතිව පන්දු 83කදි ලකුණු 58ක් හඹා යමින් සිටි අතර, සිය දෙවැනි එක්දින තරගයට ක්‍රීඩා කළ අඩි 6කුත්, අඟල් 5ක් උසැති මේ පන්දු යවන්නා පන්දු 18කින් නොදැවී ලකුණු 48ක් රැස් කරමින් සිය කණ්ඩායමේ ජයග්‍රහණය ඉක්මන් කළේ හතරේ පහර 5ක් සහ හයේ පහර 4ක් එල්ල කරමිනි. තරගයේ වීරයා සම්මානය හිමිවූයේ ද ඔහුටය.
බංග්ලාදේශ ඉනිමේ 37 වැනි ඕවරය යැවූ වනිඳු හසරංග සිය පළමු පන්දුවෙන් ලකුණු 25ක් ලබා සිටි මෙහ්දි හසන් දවාලීමෙන් පසු පිටියට පිවිසි රිෂාඩ් ලකුණු ලබාගැනීම ආරම්භ කළේ සිය පළමු පන්දුවටම වනිඳුට දැවැන්ත හයේ පහරක් එල්ල කරමිනි. එම ඕවරයේදීම සිව්වැනි පන්දුවට හතරේ පහරක් සහ පස්වැනි පන්දුවට හයේ පහරක් එල්ල කරමින් හසරංග පීඩනයකට ඇද දැමූ මේ යොවුන් පිතිකරුවා වනිඳු විසින් යවනු ලැබූ ඉනිමේ 40 වැනි ඕවරයෙන් ලකුණු 24ක්ම උදුරා ගත්තේ හයේ පහර 2ක් සහ හතරේ පහර 3ක් සමඟිනි.
පිට පිට තුන්වැනි වරටත් කාසියේ වාසිය දිනූ කුසල් මෙන්ඩිස් පළමුව පන්දුවට පහර දීමට ගත් තීරණයෙන් සාර්ථක ඵල නෙළා ගැනීමට ආරම්භක පිතිකරුවන් අසමත් වූ අතර, බංග්ලාදේශ පන්දු යවන්නෝ ශ්‍රී ලංකා පිලේ ආරම්භක පිතිකරු යුගලයම ලකුණු 15ක් ඇතුළත ක්‍රීඩාගාරයට හරවා යැවූහ. ලකුණු අතරේ සිටින පැතුම් නිශ්ශංක ඉනිමේ දෙවැනි ඕවරයේදී කඩුල්ල මුවා කිරීමට හසුකරගත් ටස්කින් අහමඩ් ඔහුගේ ඊළඟ ඕවරයේදී අවිශ්ක ප්‍රනාන්දු ලකුණු 4කට දවාගත්තේය. නායක කුසල් මෙන්ඩිස් සමඟ එක් වූ සදීර සමරවික්‍රම ශ්‍රී ලංකා ඉනිම පිළිසකර කිරීමේ උත්සාහයක නිරත වූවද, මුෂ්ටාෆිසුර් රහ්මාන්ගේ පන්දුවක් හමුවේ ඔහු දැවීයෑමත් සමඟ ශ්‍රී ලංකා පිලට තුන්වැනි කඩුල්ල අහිමි වූයේ මුළු ලකුණු 41කදීය. අනතුරුව පිටියට පැමිණි චරිත් අසලංක බංග්ලාදේශ පන්දු යවන්නන්ගේ පීඩනයෙන් මිදීමට ගත් උත්සාහය තරමක් සාර්ථක වුවත්, මුළු ලකුණු සංඛ්‍යාව 74 දී කුසල්ගේ දැවී යෑමත් සමඟ ශ්‍රී ලංකා පිල යළි ඇද වැටිණි.
ජනිත් ලියනගේ පැමිණීමත් සමඟ එක්ව පස්වැනි කඩුල්ලට ලකුණු 43ක සම්බන්ධතාවක් එක් කළ චරිත් අසංලක ලකුණු 37ක් ලබා සිටියදී දැවී යෑමෙන් පසු පැමිණි දුනිත් වෙල්ලාලගේ සහ වනිඳු හසරංගගෙන් ජනිත්ට කිසිදු දායකත්වයක් නොලැබිණි. ලකුණු 154කට කඩුලු 7ක් බිඳ වැටී දැඩි පීඩනයකට පත්ව සිටියදී අටවැනි කඩුල්ලට ජනිත් සහ මහීෂ් තීක්ෂණ එක්ව ගොඩ නැඟූ ලකුණු 60ක සම්බන්ධතාව ශ්‍රී ලංකා පිලේ අස්වැසිල්ලට හේතු විය.
මේ දෙදෙනා එක්ව මුළු ලකුණු සංඛ්‍යාව 214 දක්වා රැගෙන ගිය අතර, එය බිඳ වැටුණේ සෞම්‍ය සර්කාර්ගේ පන්දුවකට තීක්ෂණ ලකුණු 15කට දැවී යෑමත් සමඟය. ශ්‍රී ලංකා ඉනිමේ අවසන් කඩුලු දෙකම බිඳ වැටුණේ ටස්කින් විසින් යවනු ලැබූ ශ්‍රී ලංකා ඉනිමේ අවසන් ඕවරයේ අවසන් පන්දු 2දීය. පන්දු යැවීමේදී ටස්කින් කඩුලු 3ක් දවාලූ අතර, මුෂ්ටාෆිසුර් රහ්මාන් සහ මෙහ්දි හසන් අතර කඩුලු 2 බැගින් බෙදී ගියේය.
