පොලොන්නරුව වැලිකන්ද සිංහපුර ප්‍රදේශයේදී රුපියල් ලක්ෂ පහළොවක් පමණ වටිනා කීරි සම්බා පැටවූ ලොරියක් සොරාගත් බවට අත්අඩංගුවට ගනු ලැබූ සැකකරුවකු පොලිසියේ උඩු මහලෙන් බිමට පැන බරපතළ තුවාල ලබා ඇති බව වාර්තා වේ.
සිද්ධිය සම්බන්ධයෙන් සැකකරුවන් දෙදෙනකු අත්අඩංගුවට ගනු ලැබූ අතර ඔවුන් දෙදෙනාගෙන් එක් සැකකරුවකු ප්‍රශ්න කිරීමට වැලිකන්ද පොලිසියේ උඩුමහලේ දේශන ශාලාවට රැගෙන යමින් සිටියදී මෙසේ බිමට පැන පලා යෑමට උත්සාහ කර ඇති බව පැවසේ.
සැකකරු ඉකුත් 21 වැනිදා සවස උඩුමහලෙන් බිමට පැන බරපතළ තුවාල ලැබීමෙන් පසු පොලොන්නරුව මහ රෝහලට ඇතුළත් කර ඇති බව වැලිකන්ද පොලිසිය කියයි.
වැලිකන්ද සිංහ ප්‍රදේශයේ වී මෝලකට කීරි සම්බා අලෙවි කරගැනීමට ගිය ලොරියේ රියැදුරු එදින වී ලබාදීමට නොහැකි වීම හේතුවෙන් වී ලොරිය එම ස්ථානයේ නවතා ගිය විටදී එම කීරි සම්බා ලොරිය මෙම සැකකරුවන් දෙදෙනා විසින් රැගෙන ගොස් කීරි සම්බා කිලෝ 9100 කිසියම් ස්ථානයකට බා ගැනීමෙන් අනතුරුව එම ලොරිය අරලගංවිල හතර කණුව ප්‍රදේශයේ දමා ගොස් තිබිණි.
ලොරිය හා වී තොගය සොරකම් කරගෙන ගොස් ඇති බවට වී ලොරියේ හිමිකරු වන අරලගංවිල රුහුණුගම, උල්පත්වැව පදිංචි අදාළ ව්‍යාපාරිකයා පොලිසියට පැමිණිලි කර තිබිණි.
ඒ අනුව වැලිකන්ද පොලිස් ස්ථානාධිපති පොලිස් පරීක්ෂක සමන්ත රත්නායක මහතා ඇතුළු පොලිස් කණ්ඩායමක් මේ පිළිබඳ පරීක්ෂණ කර වී ලොරිය සොරකම් කරගෙන ගිය බවට සැකපිට 20 වැනිදා සවස සැකකරුවකු අත්අඩංගුවට ගෙන තිබිණි. පොලොන්නරුව ජ්‍යෙෂ්ඨ පොලිස් අධිකාරිය නිශාන් ද සිල්වා මහතාගේ මෙහෙයවීමෙන් වැලිකන්ද පොලිස් ස්ථානාධිපති පොලිස් පරීක්ෂක සමන්ත රත්නායක මහතා ඇතුළු පොලිස් නිලධාරීන් කණ්ඩායමක් මේ පිළිබඳ වැඩිදුර පරීක්ෂණ සිදු කරයි.
