‘කොළඹ වරාය සම්මාන රාත්‍රිය – 2024’ වරාය, නාවික හා ගුවන්සේවා ඇමැති නිමල් සිරිපාල ද සිල්වා මහතාගේ ප්‍රධානත්වයෙන් උත්කර්ෂවත් ලෙස කොළඹදී පැවැත්විණි.
කොළඹ වරාය සමඟ ගනුදෙනු කරන නෞකා සමාගම් 2023 වර්ෂයේදී කොළඹ වරායෙහි බහලු මෙහෙයුම් වර්ධනය සඳහා දක්වන ලද දායකත්වය පදනම් කර ගනිමින් මේ සම්මාන ප්‍රදානය සිදු කෙරිණි.
කොළඹ වරායෙහි පර්යන්ත මෙහෙය වන ශ්‍රී ලංකා වරාය අධිකාරිය, SAGT සමාගම සහ CICT සමාගම එක්ව මේ සම්මාන උලෙළ සංවිධාන කෙරිණි. දකුණු ආසියාවේ කේන්ද්‍රීය වරාය ලෙසත්, ආසියාවේ නාවික මධ්‍යස්ථානයක් ලෙසත් කොළඹ වරාය වෙළෙඳ නාවික ක්ෂේත්‍රයේ කටයුතු කරන අතර, ලොව හොඳම 23 වන බහලු මෙහෙයුම් වරාය ලෙස ද ඇල්ෆාලයිනර් ජාත්‍යන්තර දර්ශකය විසින් කොළඹ වරාය හඳුන්වාදී ඇත.
සම්මාන සඳහා නිර්දේශිත ප්‍රධාන නෞකා ජාල (Main Line) 10ක් අතරින් ‘මෙඩිටේරියන් ෂිපින් කම්පැනි’ (MSC) සමාගම පළමු ස්ථානයත්, ‘මර්ස්ක් ජාලය’ (MERSK) දෙවන ස්ථානය ලෙසත්, ‘CMA CGM’ නෞකා ජාලය තෙවන ස්ථානය ලෙසත් Hapag – Lloyd නෞකා ජාලය හතර වන ස්ථානය ලෙසත්, Ocean Network Express ජාලය පස්වන ස්ථානය ලෙසත් මෙහිදී සම්මානයට පාත්‍ර විය.
සම්මාන සඳහා නිර්දේශිත පෝෂක නෞකා ජාල (Feeder) 10 අතරින් X- Press Feeders පළමු ස්ථානයත්, GFS හෙවත් ග්ලෝබල් ෆීඩර් ලයින් දෙවන ස්ථානයත්, BTL හෙවත් බෙන්ගාල් ටයිගර් ලයින් තෙවන ස්ථානයත්, HR Lines හතර වන ස්ථානයත්, UFL හෙවත් යුනි ෆීඩර් ලයින් පස්වන ස්ථානය ලෙසත් මෙහිදී සම්මානයට පාත්‍ර විය.
මෙහිදී සිය අදහස් දක්වමින් ඇමැතිවරයා මෙලෙස ප්‍රකාශ කළේය.
“මෙලෙස කොළඹ වරාය සමඟ ගනුදෙනු කරන ප්‍රධාන නෞකා ජාල හා පෝෂක නෞකා ජාල පිළිබඳව අවධානය යොමු කරමින් ඔවුන්ගේ දායකත්වය අගයා මෙලෙස සම්මාන දීමට කටයුතු කිරීම මම ඉතාමත්ම අගය කරනවා. සම්මාන දීමේදී එහි මූල්‍ය අගය වෙනුවට ඒ ඒ සමාගම සඳහා අභිප්‍රේරණයක් ඇති කිරීම මේ ක්‍රියාවලියේ අරමුණයි. එය කොළඹ වරාය තුළ වන පර්යන්ත අතර තරගකාරීත්වයක් ඇති කිරීමටත්, එයින් ගොඩනැඟෙන කාර්යක්ෂමතාව සහ ඵලදායිතාව මත නෞකා ජාල සඳහා උසස් සේවාවක් දීමට ද හැකියාව ලැබෙනවා.”
ශ්‍රී ලංකා වරාය අධිකාරියේ සභාපති කීත් ඩී. බර්නාඩ් මහතා
“මෙලෙස කොළඹ වරාය විසින් කොළඹ වරාය සමඟ සම්බන්ධ වන නෞකා ජාල සඳහා සම්මාන ඇගැයීමක් සිදු කිරීමෙන් එකිනෙකා අතර දැඩි විශ්වාසයක් ඇති කරගැනීමට අවස්ථාවක් උදා වෙනවා.”
