පාර්ලිමේන්තු මන්ත්‍රීවරුන්ව සිට අභාවප්‍රාප්ත ආර්.එම්. කරුණාරත්න, බන්දුල බස්නායක, පී.එම්.බී. සිරිල් මහත්වරුන් මෙරට ජනතාවගේ හිත් දිනා ගත් අවංක දේශපාලනඥයන් බව ශ්‍රී ලංකා පොදුජන පෙරමුණේ හම්බන්තොට දිස්ත්‍රික් මන්ත්‍රි චමල් රාජපක්ෂ මහතා පාර්ලිමේන්තුවේ දී ඊයේ (22) පැවැසීය.
ශෝක ප්‍රකාශ යෝජනා සම්බන්ධයෙන් පැවැති විවාදයට එක්වෙමින් ඒ මහතා මේ බව පැවැසීය.
මන්ත්‍රීවරයා මෙසේ ද පැවැසීය.
හම්බන්තොට දිස්ත්‍රික් හිටපු පාර්ලිමේන්තු මන්ත්‍රි පී.එම්.බී. සිරිල් මහතාගේ අභාවය රටටම පාඩුවක්. ඒ මහතා තිස්සමහාරාමයට එක්සත් ජාතික පක්ෂයෙන් ඉදිරිපත් වුණා. 77 මැතිවරණයෙන් විශිෂ්ට ජයක් ලබා පාර්ලිමේන්තුවට පැමිණ වසර 16ක් පමණ මෙම සභාව නියෝජනය කළා. එතුමා ගෞරවනීය සේවාවක් රටට සිදු කළ පුද්ගලයෙක්. කඩිනම් මහවැලි ව්‍යාපාරය සිදු කරන විට ලුණුගම්වෙහෙර ව්‍යාපෘතිය එකතු කරගෙන අවසන් කර අති විශාල ගොවි බිම් ප්‍රමාණයකට ජලයත්, ඉඩම් නොමැතිව සිටි ගොවීන්ට ඉඩම් ලබාදීමටත් ඒ මහතා කටයුතු කළා. සූරියවැව එදා වල් බිහිව තිබුණා. පක්ෂ භේදයෙන් තොරව කටයුතු කළ නිසා සියලුදෙනාගේ හිත් දිනා ගත් දේශපාලනඥයෙක් වුණා. අසූ ගණන්වල ඡන්දයට ඉදිරිපත් වුණොත් මරනවා කියලා තුණ්ඩු කෑලි බෙදූ කාලයක් වුණා. ඒ අවස්ථාවේ එතුමාගේ බිරිය ඉදිරිපත්ව ජයග්‍රහණය කළා. බදුල්ල දිස්ත්‍රික්කයේ හිටපු පාර්ලිමේන්තු මන්ත්‍රි ආර්.එම්. කරුණාරත්න මහතාත්, කුරුණෑගල දිස්ත්‍රික්කයේ හිටපු පාර්ලිමේන්තු මන්ත්‍රි බන්දුල බස්නායක මහතාත් රටට අහිමි වුණා. ඔවුන් මෙරට ජනතාවට විශාල සේවාවක් කළ මහජන නියෝජිතයන්. මෙම මහත්වරුන් තිදෙනාගේම අභාවය රටට පාඩුවක්.”
