කොස්ගොඩ පොලිස් වසමේ වතුරවෙල ප්‍රදේශයේ ළිඳක් ඉසිමින් සිටිය දී ළිඳට බැසීමෙන් පසු හුස්ම ගැනීමේ අපහසුතාවට ලක්ව බළපිටිය මූලික රෝහලට ඇතුළත් කළ අයකු ඊයේ (22) මියගොස් ඇතැයි කොස්ගොඩ පොලිසිය පවසයි.
මෙසේ මියගොස් ඇත්තේ ඇල්පිටි‍ෙය් පදිංචි ගාල්ලගේ ජගත් කීර්ති නමැති පනස් හැවිරිදි අයෙකි. මියගිය අය තවත් අයකු සමඟ වතුරවෙල ප්‍රදේශයේ කොන්ක්‍රීට් වැඩපොළක පිහිටි ළිඳක් ඉසිමින් සිටිය දී මෙම අනතුරට මුහුණපා ඇත.
මෝටරයක් යොදා ජලය ඉවත් කළ පසු ළිඳ පිරිසුදු කිරීමට ළිඳ තුළට බැස ඇති ඔහුට එහිදී හුස්ම ගැනීමට නොහැකි වීම නිසා සිහිසුන් වී ඇත. අනතුරුව ඔහුගේ සහායට ළිඳ තුළට බැසගත් තවත් අයකු ද අසනීප වී ඇති බව පොලිසිය පවසයි. පසුව දෙදෙනාම 1990 ගිලන් රථයකින් බළපිටිය මූලික රෝහලට ඇතුළත් කිරීමේ දී ජගත් නමැත්තා මියගොස් සිටි බවත් අනිත් තැනැත්තා බළපිටිය මූලික රෝහලේ ප්‍රතිකාර ලබන බවත් පොලිසිය කියයි.
මියගිය අයගේ හදිසි මරණ පරීක්ෂණය අද (23) බළපිටිය මූලික රෝහලේ පැවැත්වීමට නියමිතව ඇති අතර කොස්ගොඩ පොලිස් ස්ථානාධිපති ප්‍රධාන පොලිස් පරීක්ෂක ප්‍රභාත් දේශබන්ධු මහතා ඇතුළු නිලධාරීහු වැඩිදුර පරීක්ෂණ පවත්වති.
