කැකිරාව ගනේවල්පොළ ප්‍රධාන මාර්ගයේ ඇඹුල්ගස්වැව ප්‍රදේශයේදී පෙරේදා (21) සවස සිදු වූ අනතුරකින් දොළොස් හැවිරිදි සිසුවෙකු එම ස්ථානයේදීම මරුමුවට පත්ව ඇතැයි කැකිරාව පොලිසිය පවසයි.
මෙලෙස අවාසනාවන්ත ලෙස මරණයට පත්ව ඇත්තේ පසුගිය ශිෂ්‍යත්ව විභාගයෙන් ඉහළම සාමාර්ථ්‍යය ලබා කැකිරාව බස්තියන් සිල්වා මහ විද්‍යාලයේ 06 වෙනි ශ්‍රේණියේ අධ්‍යපනය ලැබූ 12 හැවිරිදි කුසල යුවහස් සංධීර නමැති සිසුවෙකි.
කැකිරාව නගරයේ සිට බස් රථයකින් පැමිණ ඇඹුල්ගස්වැව ප්‍රදේශයේ පිහිටි සිය නිවෙස අසලදී බස් රථයෙන් බැස මර්ගය හරහා මාරුවීමට උත්සාහ කිරීමේදී සිසුවා මෙලෙස අනතුරට මුහුණපා තිබේ.
අනතුරින් මියගිය දරුවාගේ පියා දරුවා කුඩා කලම පවුලෙන් වෙන්ව ගොස් ඇති අතර මව සිය දරුවන් හදා වඩා ගැනීමට විදේශ රටක ගෘහ සේවය සඳහා ගොස් සිටී.
මෙම සිසුවා සිය පුංචි සහ මිත්තනිය භාරයේ ඔවුන්ගේ රැකවරණය යටතේ හැදී වැඩී තිබේ.
අනතුර සිදුවූ ස්ථානයට පැමිණි කැකිරාව මහේස්ත්‍රාත් ඩී.පී.එස්.එම්.කරුණාරත්න මහත්මිය ස්ථානීය මහේස්ත්‍රාත් පරීක්ෂණය සිදු කළේය.
අනතුරට සම්බන්ධ ලොරියේ රියැදුරු කැකිරාව පොලිසිය විසින් අත්අඩංගුවට ගෙන ඇත.
ඔහු පුත්තලම මුන්දලම ප්‍රදේශයේ පදිංචි පනස් නව හැවිරිදි අයෙකි.
ඔහු කැකිරාව මහේස්ත්‍රාත් අධිකරණය හමුවට ඉදිරිපත් කිරීමට නියමිය.
