මේ වසරේ සැප්තැම්බර් හා ඔක්තෝබර් මාසවලදී බංග්ලාදේශයේ පැවැත්වෙන ලෝක කුසලාන කාන්තා විස්සයි20 තරගාවලියේ ඉතිරි ස්ථාන දෙක සඳහා රටවල් දෙකක් තෝරා ගැනීමේ අදිටනින් පැවැත්වෙන සුදුසුකම් ලැබීමේ තරගාවලිය ලබන මස 25 වැනිදා සිට අබුඩාබිහිදී පැවැත්වීමට අයිසීසීය කටයුතු යොදා ඇත.
එම සුදුසුකම් ලැබීමේ තරගාවලියේ තායිලන්තය සමඟ පළමු තරගයට ශ්‍රී ලංකා කාන්තා ක්‍රිකට් පිල මේ මස 25 වැනිදා අබුඩාබි ටොලරන්ස් ඕවල් පිටියට පිවිසෙයි. මෙම ලෝක කුසලාන කාන්තා විස්සයි 20 සුදුසුකම් ලැබීමේ තරගාවලියට කණ්ඩායම් 10ක් සහභාගීවන අතර, අබුඩාබි සයීඩ් ක්‍රිකට් ක්‍රීඩාංගණයේ සහ ටොලරන්ස් ඕවල් පිටියේදී තරග පැවැත්වේ.
‘ඒ’ කාණ්ඩයෙන් ශ්‍රී ලංකාව, ස්කොට්ලන්තය, තායිලන්තය, උගන්ඩාව හා අමෙරිකාව තරග වදින අතර, ‘බී’ කාණ්ඩයෙන් නෙදර්ලන්තය, අයර්ලන්තය, එක්සත් අරාබි එමීර් රාජ්‍ය, වනුවාටු හා සිම්බාබ්වේ යන රටවල් සහභාගි වෙති. කාණ්ඩ දෙකේ මුල් කණ්ඩායම් දෙක අතර අවසන් මහා තරගය මැයි මස 7 වැනිදා පැවැත්වීමට නියමිතය. ලෝක කුසලාන කාන්තා විස්සයි20 තරගාවලියට දැනටමත් සත්කාරක බංග්ලාදේශය, පසුගිය වසරේ පැවති ලෝක කුසලාන තරගාවලියේ මුල් ස්ථාන 6ට පත්වූ ඔස්ට්‍රේලියාව, එංගලන්තය, ඉන්දියාව, දකුණු අප්‍රිකාව, නවසීලන්තය හා බටහිර ඉන්දීය කොදෙව් යන කණ්ඩායම් හා 2023 කාන්තා ලෝක කුසලාන තරගාවලිය අවසන් වෙද්දී ශ්‍රේණිගත කිරීම අනුව පාකිස්තානය ද සුදුසුකම් ලබා ඇත.
සුදුසුකම් ලැබීමේ තරග වටයේදී ශ්‍රී ලංකාව සහභාගීවන තරග:
අප්‍රේල් 25: ශ්‍රී ලංකාව – තායිලන්තය
අප්‍රේල් 27: ස්කොට්ලන්තය හා ශ්‍රී ලංකාව
මැයි 1: ශ්‍රී ලංකාව – උගන්ඩාව
මැයි 3: ශ්‍රී ලංකාව – අමෙරිකා එක්සත් ජනපදය.
