මාර්ගගත ක්‍රමවල සුරක්ෂිතතාව පිළිබඳ පනත් කෙටුම්පත (on line safety bill) පාර්ලිමේන්තුවේදී සම්මත කළ ආකාරය ආණ්ඩුක්‍රම ව්‍යවස්ථාවට පටහැනි යැයි තීන්දුවක් ලබා දෙන ලෙස ඉල්ලා ගොනුකර තිබෙන මූලික අයිතිවාසිකම් පෙත්සම් පංච පුද්ගල ශ්‍රේෂ්ඨාධිකරණ විනිසුරු මඬුල්ලක් හමුවේ ලබන ජූලි මස 24 වැනිදා සලකා බැලීමට ශ්‍රේෂ්ඨාධිකරණය ඊයේ (25) තීරණය කළේය.
ශ්‍රේෂ්ඨාධිකරණ විනිසුරු එස්. තුරෙයිරාජා මහතාගේ සභාපතිත්වයෙන් යුතුව ඒ. එච්. එම්. ඩී. නවාස්, ශිරාන් ගුණරත්න, අචල වෙංගප්පුලි සහ මහින්ද සමයවර්ධන යන මහත්වරුන්ගෙන් එම පංචපුද්ගල විනිසුරු මඬුල්ල සමන්විත වේ.
ට්‍රාන්ස්පේරන්සි ඉන්ටර්නැෂනල් ආයතනය ඇතුළු පාර්ශ්ව කිහිපයක් විසින් ගොනු කර ඇති අදාළ පෙත්සම් එම විනිසුරු මඬුල්ල හමුවේ කැඳවූ අවස්ථාවේදී මේ බව තීරණය කරන ලදි. එහිදී විනිසුරු මඬුල්ල නියෝග කළේ අදාළ පෙත්සම්හි කරුණු තහවුරු කිරීම සඳහා ලබන ජූලි 24 දින කැඳවන ලෙසය.
මාර්ගගත ක්‍රමවල සුරක්ෂිතතාව පිළිබඳ පනත් කෙටුම්පතට එරෙහිව ගොනු කළ පෙත්සම් විභාගයෙන් පසුව එහි ඇතුළත් වගන්තිවල ව්‍යවස්ථානුකූලභාවය පිළිබඳ සිය තීන්දුව කථානායකවරයාට දන්වා යවන ලදි. එහෙත් එම පනත් කෙටුම්පත සම්මත කිරීමේදී පාර්ලිමේන්තුව ශ්‍රේෂ්ඨාධිකරණය විසින් ලබා දුන් සංශෝධන ඊට ඇතුළත් කර නොමැති බවට මෙම පෙත්සම් මගින් පෙන්වා දී ඇත.
ඒ අනුව අදාළ පනත් කෙටුම්පත සම්මත කළ ආකාරය සහ ඊට අත්සන් තැබීමට කථානායකවරයා ගනු ලැබූ තීරණය ආණ්ඩුක්‍රම ව්‍යවස්ථාවට පටහැනි බවට ප්‍රකාශ කරන ලෙස පෙත්සම් මඟින් ඉල්ලා ඇත. එසේම එම පනත් කෙටුම්පත සම්මත කළ ආකාරය මඟින් මෙරට ජනාධිපති මූලික අයිතිවාසිකම් උල්ලංඝනය වන බවට තීන්දුවක් ලබා දෙන ලෙස ද පෙත්සම් මඟින් ඉල්ලා ඇත.
අතිරේක සොලිසිටර් ජෙනරාල් විරාජ් දයාරත්න මහතා නීතිපතිවරයා වෙනුවෙන් පෙනී සිටියේය.
