යහපාලන කාලයේ දී සිදු වූ දේශපාලන පළිගැනීම් පිළිබඳව සොයා බැලීමට හිටපු ජනාධිපති ගෝඨාභය රාජපක්ෂ මහතා විසින් පත් කරනු ලැබූ උපාලි අබේරත්න ජනාධිපති විමර්ශන කොමිසමේ වාර්තාව මගින් ජනාධිපති රනිල් වික්‍රමසිංහ මහතා, ජාතික ජන බලවේගයේ නායක අනුර කුමාර දිසානායක ඇතුළු හය දෙනකු සම්බන්ධයෙන් සිදුකර ඇති සොයා ගැනීම්, තීරණ සහ නිර්දේශ බලරහිත කරන සර්ටියෝරාරි රිට් ආඥාවක් අභියාචනාධිකරණය විසින් ඊයේ (25) නිකුත් කරන ලදි.
ජනාධිපති රනිල් වික්‍රමසිංහ මහතා, ජාතික ජන බලවේගයේ නායක අනුර කුමාර දිසානායක මහතා, අපරාධ පරීක්ෂණ දෙපාර්තමේන්තුවේ හිටපු අධ්‍යක්ෂ ශානි අබේසේකර මහතා, හිටපු හමුදාපති සරත් ෆොන්සේකා මහතා, ජනාධිපති නීතිඥවරුන් වන ජයම්පති වික්‍රමරත්න, ජේ. සී. වැලිඅමුණ යන මහත්වරුන් සම්බන්ධයෙන් අදාළ වාර්තාව මගින් කර ඇති නිර්දේශ සහ සොයාගැනීම් මෙලෙස බලරහිත කරමින් වෙන් වෙන් වශයෙන් රිට් ආඥා නිකුත් කෙරිණි.
අදාළ වාර්තාව මත පදනම්ව ඔවුන් සම්බන්ධයෙන් ඉදිරි පියවර ගැනීමෙන් බලධාරීන් වළක්වන ප්‍රොහිබිෂන් රිට් ආඥාවක් ද නිකුත් කරන ලදි.
අභියාචනාධිකරණ සභාපති විනිසුරු නිශ්ශංක බන්දුල කරුණාරත්න සහ අභියාචනාධිකරණ විනිසුරු ඩී.එම්. සමරකෝන් සහ අභියාචනාධිකරණ විනිසුරු ලෆාර් තාහීර් යන මහත්වරුන් පෙත්සම් සම්බන්ධයෙන් වන සිය ඒකමතික තීන්දුව ප්‍රකාශයට පත් කරමින් මෙම රිට් ආඥා නිකුත් කරන ලදි.
අදාළ කොමිසමේ නිර්දේශ බලරහිත කරන ලෙස ඉල්ලා ජනාධිපති රනිල් වික්‍රමසිංහ මහතා, ජාතික ජන බලවේගයේ නායක අනුර කුමාර දිසානායක මහතා, අපරාධ පරීක්ෂණ දෙපාර්තමේන්තුවේ හිටපු අධ්‍යක්ෂ ශානි අබේසේකර මහතා, හිටපු හමුදාපති සරත් ෆොන්සේකා මහතා, ජනාධිපති නීතිඥවරුන් වන ජයම්පති වික්‍රමරත්න, ජේ. සී. වැලිඅමුණ විසින් ගොනු කරන ලද රිට් පෙත්සම් 08ක විභාගය අවසන් කරමින් මෙම රිට් ආඥා නිකුත් කරන ලදි. අදාළ පෙත්සම්වලට අදාළව නඩු තීන්දු අටක් ප්‍රකාශයට පත් කෙරිණි.
මෙම පෙත්සම්වල වගඋත්තරකරුවන් ලෙස දේශපාලන පළිගැනීම් විමර්ශන කොමිසමේ සභාපති විශ්‍රාමික ශ්‍රේෂ්ඨාධිකරණ විනිසුරු උපාලි අබේරත්න, සාමාජිකයින් වන චන්ද්‍රසිරි ජයතිලක හා චන්ද්‍රා ප්‍රනාන්දු, එම කොමිසමේ ලේකම් හා ජනාධිපති ලේකම්වරයා නම් කර සිටියහ.
අගමැතිව සිටියදී රනිල් වික්‍රමසිංහ මහතා ඇතුළු සෙසු පෙත්සම්කරුවන් විසින් සිය පෙත්සම් ඉදිරිපත් කර තිබුණේ අදාළ කොමිසමට කැඳවූ අවස්ථාවේදී තමන්ට චෝදනා පත්‍රයක් හෝ පැමිණිල්ලක් ඉදිරිපත් නොවූ බව සඳහන් කරමිනි.
එහෙත් එම කොමිසමේ වාර්තාවෙහි තමන්ට එරෙහිව සොයාගැනීම් සහ නිර්දේශ සඳහන් කර ඇති අතර එමකොමිසම විමර්ශනය කළ ආකාරය සම්පූර්ණයෙන්ම නීතියට පටහැනි යැයි ද තමන්ට පැවරී ඇති බලතල ඉක්මවා ඔවුන් ක්‍රියාකර ඇතැයි ද පෙත්සම් මඟින් පෙන්වා දී තිබිණි.
එම කොමිසමේ විමර්ශන, නිර්දේශ සහ සොයාගැනීම් ආණ්ඩුක්‍රම ව්‍යවස්ථාවට පටහැනි බැවින් ඒවා බලරහිත කරන රිට් ආඥාවක් නිකුත් කරන ලෙස ද එම නිර්දේශ මත කටයුතු කිරීම වළක්වන අතුරු තහනම් නියෝගයක් නිකුත් කරන ලෙස ද පෙත්සම් මඟින් ඉල්ලා තිබුණි.
පෙත්සම් සම්බන්ධයෙන් අධිකරණය හමුවේ ඉදිරිපත් වූ කරුණු සලකා බැලූ විනිසුරු මඬුල්ල තීරණය කර ඇත්තේ ජනාධිපති රනිල් වික්‍රමසිංහ මහතා ඇතුළු සෙසු පෙත්සම්කරුවන් කොමිසන් සභාවට කැඳවීමකින් තොරව ඔවුන් සම්බන්ධයෙන් නිර්දේශ ලබාදීමට කටයුතු කිරීම අසාධාරණ සහ අත්තනෝමතික ක්‍රියාවක් බවය.
එබැවින් එම කොමිසමේ නිර්දේශ සහ සොයා ගැනීම් සහ තීරණ අවලංගු කිරීමට අධිකරණය මැලි නොවන බව ද අදාළ තීන්දුවේ සඳහන් වේ. විදානපතිරණ නීතිඥ සමාගමේ උපදෙස් මත ජනාධිපති නීතිඥ ෆායිස් මුස්තාපා සහ නීතිඥ සුරේන් ප්‍රනාන්දු මහතා ජනාධිපති රනිල් වික්‍රමසිංහ මහතා වෙනුවෙන් පෙනී සිටියහ.
අතිරේක සොලිසිටර් ජෙනරාල් මිලින්ද ගුණතිලක මහතා නීතිපතිවරයා වෙනුවෙන් පෙනී සිටියේය.
