ලෝක නාට්‍ය දින සැමරුම් උත්සවය හෙට (27) පෙරවරු 9.00ට මරදාන එල්ෆින්ස්ටන් රඟහලේදී පැවැත්වේ.
බුද්ධශාසන, ආගමික හා සංස්කෘතික කටයුතු ඇමැති විදුර වික්‍රමනායක මහතාගේ ප්‍රධානත්වයෙන්, පාසල් සිසුන් ප්‍රවීණ නාට්‍යකරුවන්, අමාත්‍යාංශ නිලධාරීන්ගේ සහභාගීත්වයෙන් මෙය පැවැත්වෙන අතර ජාත්‍යන්තර රංග කලා ආයතනයේ (ITI) මෙරට නියෝජිතයා ලෙසින් ටවර් හෝල් රඟහල පදනම මෙම සැමරුම් උත්සවය වාර්ෂිකව සංවිධානය කරනු ලබයි.
ප්‍රවීණ නාට්‍යවේදී චාමික හත්ලහවත්ත මහතාගේ උපදේශකත්වයෙන්, ටවර් නාට්‍ය හා රංග කලා පාසලේ සිසු දරු දැරියන් නිර්මාණය කර නිෂ්පාදනය කරනු ලැබූ සිහින ලන්තෑරුම, Lilly’s Magic World, මායා පින්සල හා කිඩාරම් යන ළමා නාට්‍ය මෙදින නොමිලේ වේදිකා ගත කිරීමට නියමිතය. මෙම උලෙළේ මුඛ්‍ය දේශනය පවත්වනු ලබන්නේ රාජ්‍ය නාට්‍ය උපදේශක සභාවේ සභාපති, කැලණිය විශ්වවිද්‍යාලයේ නාට්‍ය හා රංග කලා අධ්‍යයන අංශයේ හිටපු අංශාධිපති චන්ද්‍රසිරි බෝගමුව මහතා විසිනි. ලෝක නාට්‍ය දිනය නිමිත්තෙන් ජාත්‍යන්තර රංග කලා ආයතනය සෑම වසරකම ජාත්‍යන්තර තලයේ නාට්‍යකරුවකු රචිත නාට්‍ය දින පණිවිඩයක් නිල වශයෙන් ප්‍රකාශයට පත්කර එය සිය සාමාජික රටවල් වෙත බෙදා හරියි. මෙවර ලෝක නාට්‍ය දින පණිවිඩය ඉදිරිපත් කර ඇත්තේ නෝර්වීජියානු ජාතික ලේඛකයකු වන ජොන් ෆොසේ (Mr. Jon Fosse) මහතා විසිනි.
